”میں مر جاؤں گا، مجھے بچالو!“ سانحہ گل پلازہ میں لاپتا نوجوان کی آخری کال

کراچی: گل پلازہ میں ہفتے کی رات لگنے والی آگ کے بعد ایک نوجوان نے اپنے بھائی کو آخری کال میں کہا: "میں مر جاؤں گا، مجھے بچالو!”۔

تفصیلات کے مطابق، کراچی کے مشہور شاپنگ مال گل پلازہ میں اچانک بھڑکنے والی آگ نے کئی دکانداروں اور خریداروں کو عمارت میں پھنسنے پر مجبور کر دیا۔

حکام کے مطابق، سانحے میں اب تک کم از کم 14 افراد جاں بحق ہو چکے ہیں۔ تاہم، کئی لوگ اب بھی اندر پھنسے ہوئے ہیں اور لاپتا ہیں، جس کی وجہ سے ہلاکتوں میں اضافہ ہونے کا خدشہ ہے۔

نوجوان کے بھائی نے اے آروائی نیوز سے بات کرتے ہوئے بتایا کہ بھائی نے دکان سے لائٹ جلا کر سگنل بھیجا اور فون پر کہا: "میں مر جاؤں گا، مجھے بچالو!”۔

نوجوان کے بھائی کا کہنا تھا کہ دکان میں موجود دیگر افراد نے کھڑکی توڑنے کی کوشش کی، لیکن وہ آگ کی شدت کی وجہ سے ناکام رہے۔

ایک اور متاثرہ نوجوان نے بتایا کہ اس کا بھائی خوف کے مارے باہر نہیں نکل سکا اور دکان کے اندر محصور رہا۔ صبح تک اس سے کوئی رابطہ نہیں ہو سکا۔

متاثرہ خاندان کی ایک خاتون نے بھی مدد کی اپیل کی اور کہا: "میرے شوہر اور دو بچے ابھی اندر ہیں۔ خدا کے لیے کسی طرح انہیں بچا لیں۔”

ریسکیو ٹیمیں دن رات تلاش کر رہی ہیں۔ آگ نے نہ صرف دکانوں اور مال کو نقصان پہنچایا بلکہ کئی لوگ اب بھی لاپتا ہیں۔ حکام کا کہنا ہے کہ سرچ آپریشن جاری ہے اور لاپتا افراد کو جلد نکالا جائے گا۔