ہر پاکستانی خود کو پہلے سے زیادہ غریب کیوں سمجھ رہا ہے؟ سروے میں اہم انکشاف

وفاقی ادارہ شماریات کی ہاؤس ہولڈ انٹیگریٹڈ اکنامکس سروے رپورٹ کے مطابق گزشتہ پانچ سال میں شہریوں کی اوسط آمدنی میں 97 فیصد اضافہ ہوا ہے۔
تاہم، گھریلو اخراجات 113 فیصد بڑھ گئے ہیں۔ اس کا مطلب ہے کہ لوگوں کی خریداری کی طاقت کم ہو گئی ہے۔ ہر پاکستانی خود کو مالی طور پر کمزور محسوس کر رہا ہے۔

خوراک اور غذائی عدم تحفظ کا بڑھتا ہوا مسئلہ

رپورٹ میں بتایا گیا ہے کہ پاکستان میں ہر چار میں سے ایک گھرانہ غذائی عدم تحفظ کا شکار ہے۔
چھ سال میں غذائی عدم تحفظ میں 53 فیصد اضافہ ہوا ہے۔
شہری علاقوں میں یہ صورتحال سب سے زیادہ تشویشناک ہے، جہاں مہنگائی نے قوت خرید کم کر دی ہے۔

مہنگائی، بحران اور قدرتی آفات کے اثرات

ماہرین کا کہنا ہے کہ کرونا وبا، 2022 کے تباہ کن سیلاب اور مسلسل مہنگائی عوام کی معاشی حالت خراب کرنے میں اہم کردار ادا کر رہے ہیں۔
بلوچستان اور سندھ میں صورت حال سب سے زیادہ سنگین ہے۔ حیران کن بات یہ ہے کہ پنجاب میں سستی روٹی جیسے منصوبے بھی بھوک پر قابو نہیں پا سکے۔

گھریلو آلات، صحت اور تعلیم پر بڑھتے اخراجات

رپورٹ کے مطابق گھرانے سب سے زیادہ فرنشنگ، گھریلو آلات، فوڈز اور ہیلتھ کے اخراجات پر پیسہ خرچ کر رہے ہیں۔
ملک میں ذاتی ملکیتی گھروں کی شرح کمی پر ہے، جو بڑھتی ہوئی آبادی کی وجہ سے مزید کم ہو رہی ہے۔
تعلیم کے شعبے میں کچھ بہتری آئی ہے۔ شرح خواندگی 60 فیصد سے بڑھ کر 63 فیصد ہوگئی، جبکہ اسکول سے باہر بچوں کی شرح 30 فیصد سے کم ہو کر 28 فیصد رہ گئی ہے۔

صحت اور صاف ایندھن کے استعمال میں بہتری

حفاظتی ٹیکہ جات کی کوریج 68 فیصد سے بڑھ کر 73 فیصد ہو گئی ہے۔
صاف ایندھن کے استعمال میں بھی اضافہ ہوا ہے، جو 35 فیصد سے بڑھ کر 38 فیصد تک پہنچ گیا ہے۔