ماہرین صحت نے کھانے کے بعد چائے پینے والوں کیلئے خطرے کی گھنٹی بجادی

چائے پاکستان سمیت دنیا بھر میں بے حد مقبول مشروب ہے۔ زیادہ تر لوگ دن کا آغاز چائے سے کرتے ہیں، جبکہ بہت سے افراد کھانے کے فوراً بعد چائے پینے کے عادی ہوتے ہیں۔ تاہم حالیہ طبی تحقیق سے معلوم ہوا ہے کہ کھانے کے بعد چائے پینا صحت کے لیے فائدہ مند نہیں بلکہ نقصان دہ ثابت ہو سکتا ہے۔

ماہرین صحت کے مطابق کھانے کے فوراً بعد چائے پینے سے نظامِ ہاضمہ متاثر ہوتا ہے۔ خاص طور پر چاول یا بھاری کھانے کے بعد چائے پینے سے معدہ درست طریقے سے غذا ہضم نہیں کر پاتا۔ چائے میں موجود کیفین اور ٹینن غذائی اجزاء کے جذب کو سست کر دیتے ہیں، جس کے باعث بدہضمی، سینے کی جلن اور پیٹ درد جیسے مسائل پیدا ہو سکتے ہیں۔

ماہرین کا کہنا ہے کہ چائے میں شامل فاسفورک ایسڈ ہڈیوں کے لیے نقصان دہ ثابت ہو سکتا ہے، جبکہ کیفین بلڈ پریشر میں اضافے کا سبب بنتی ہے۔ اس کے علاوہ کھانے کے فوراً بعد چائے پینے سے نیند میں خلل پڑنے کا بھی خدشہ ہوتا ہے، خاص طور پر ان افراد میں جو پہلے ہی نیند کی کمی کا شکار ہوں۔

طبی ماہرین اور نیشنل لائبریری آف میڈیسن کی رپورٹس کے مطابق زیادہ مقدار میں چائے اور کافی کا استعمال ذیابیطس کے خطرے کو بڑھا سکتا ہے۔ اس کے ساتھ ساتھ میٹھی چائے اور سافٹ ڈرنکس کا زیادہ استعمال وزن بڑھنے اور شوگر لیول میں اضافے کا سبب بنتا ہے۔

ذیابیطس کے مریضوں کے لیے یہ عادت مزید خطرناک ثابت ہو سکتی ہے، کیونکہ کھانے کے بعد چائے پینے سے خون میں شوگر کی سطح تیزی سے بڑھ سکتی ہے۔ کیفین دل کی دھڑکن کو بھی تیز کر سکتی ہے، جو ہائی بلڈ پریشر کے مریضوں کے لیے نقصان دہ ہے۔

ماہرین صحت کا مشورہ ہے کہ کھانے کے کم از کم 30 سے 45 منٹ بعد چائے پی جائے۔ بہتر ہے کہ چائے بغیر چینی استعمال کی جائے اور سافٹ ڈرنکس سے حتی الامکان پرہیز کیا جائے۔ اس عادت کو بہتر بنا کر نہ صرف ہاضمہ بہتر رکھا جا سکتا ہے بلکہ کئی بیماریوں سے بھی بچاؤ ممکن ہے۔