سیونگز سرٹیفکیٹس رکھنے والوں کیلئے بڑی خبر آگئی

سیونگز سرٹیفکیٹس رکھنے والوں کے لیے ایک اہم خبر سامنے آ گئی ہے۔

 سینٹرل ڈائریکٹوریٹ آف نیشنل سیونگز (CDNS) نے جنوری 2026 کے لیے ڈیفنس اور بہبود سیونگز سمیت دیگر بچت اسکیموں پر منافع کی نئی شرح جاری کر دی ہے۔

اس کے مطابق ڈیفنس سیونگ سرٹیفکیٹس (DCS) میں 64 بیس پوائنٹس کی کمی کی گئی ہے اور اب یہ 10.44 فیصد سالانہ پیش کر رہے ہیں۔ بہبود سیونگ سرٹیفکیٹس (BCS)، پنشنرز بینیفٹ اکاؤنٹس (PBA) اور شہدا فیملی ویلفیئر اکاؤنٹس (SFW) میں 48 بیس پوائنٹس کی کمی کے بعد منافع 12 فیصد سالانہ ہو گیا ہے۔

ریگولر انکم سرٹیفکیٹس کے حامل افراد اب 9.96 فیصد سالانہ منافع حاصل کریں گے۔ اسپیشل سیونگ سرٹیفکیٹس میں سب سے زیادہ کمی دیکھی گئی ہے، 80 بیس پوائنٹس کی کمی کے بعد اب یہ 9.4 فیصد سالانہ دے رہے ہیں۔ اس کے برعکس اسپیشل سیونگ اکاؤنٹس (SSA) 10.2 فیصد پر برقرار ہیں، جو کچھ حد تک استحکام فراہم کرتے ہیں۔

اسلامک بچت پروڈکٹس بھی متاثر ہوئی ہیں۔ سروہ اسلامک ٹرم اکاؤنٹ اب 9.96 فیصد سالانہ اور سروہ اسلامک سیونگ اکاؤنٹ 9.92 فیصد سالانہ پیش کر رہا ہے۔ اس تبدیلی کے بعد بچت کرنے والوں کے لیے ریٹرن میں واضح کمی دیکھی جا رہی ہے۔