برطانوی وزیر اعظم چین کے تاریخی دورے پر بیجنگ پہنچ گئے

برطانوی وزیر اعظم چین کے تاریخی دورے پر بیجنگ پہنچ گئے ہیں۔

برطانوی وزیرِاعظم کیئر اسٹار مرکل چین کے دورے پر بیجنگ پہنچ گئے، جو 2018 کے بعد کسی بھی برطانوی وزیرِاعظم کا پہلا دورہ ہے۔ اس دورے کا مقصد چین کے ساتھ سیاسی اور تجارتی تعلقات کو مضبوط بنانا ہے، خاص طور پر ایسے وقت میں جب مغربی ممالک اور امریکا کے درمیان تعلقات میں بے یقینی پائی جا رہی ہے۔

کیئر اسٹار مرکل نے کہا کہ اگرچہ برطانیہ کو ممکنہ سیکیورٹی خدشات کے حوالے سے محتاط رہنا ہوگا، لیکن دنیا کی دوسری بڑی معیشت چین کو نظرانداز کرنا بھی ممکن نہیں۔ طیارے میں صحافیوں سے گفتگو کرتے ہوئے ان کا کہنا تھا کہ چین کے معاملے میں آنکھیں بند کرنا دانشمندی نہیں، بلکہ برطانیہ کے مفاد میں ہے کہ وہ چین کے ساتھ روابط رکھے۔ انہوں نے اس دورے کو انتہائی اہم قرار دیتے ہوئے کہا کہ اس سے مثبت پیش رفت کی توقع ہے۔

برطانوی وزیرِاعظم کے ہمراہ 50 سے زائد کاروباری رہنماؤں پر مشتمل وفد بھی موجود ہے۔ کیئر اسٹار مرکل جمعرات کو چینی صدر شی جن پنگ اور وزیرِاعظم لی چیانگ سے ملاقات کریں گے، جبکہ جمعہ کو وہ شنگھائی جا کر مقامی کاروباری شخصیات سے بات چیت کریں گے۔

یہ دورہ ایسے وقت میں ہو رہا ہے جب برطانیہ اور چین کے تعلقات کئی برسوں سے تناؤ کا شکار رہے ہیں۔ اس کی وجوہات میں ہانگ کانگ میں سیاسی آزادیوں پر پابندیاں، یوکرین جنگ میں چین کا روس کی حمایت کرنا اور برطانوی خفیہ اداروں کی جانب سے چین پر جاسوسی کے الزامات شامل ہیں۔ تاہم چین کے لیے یہ دورہ خود کو ایک مستحکم اور قابلِ اعتماد شراکت دار کے طور پر پیش کرنے کا موقع بھی ہے۔