ایرانی آرمی چیف نے امریکا و اسرائیل کو وارننگ دیدی

ایران کے آرمی چیف جنرل امیر حاتمی نے امریکا اور اسرائیل کو سخت انتباہ جاری کیا ہے۔

 ایران کے آرمی چیف جنرل امیر حاتمی نے کہا ہے کہ ایران کی مسلح افواج ہر وقت مکمل طور پر الرٹ ہیں اور کسی بھی ممکنہ خطرے سے نمٹنے کی پوری صلاحیت رکھتی ہیں۔ ان کا کہنا تھا کہ دشمن کی کسی بھی غلط حرکت کے سنگین نتائج سامنے آ سکتے ہیں۔

غیر ملکی خبر ایجنسی کے مطابق جنرل امیر حاتمی نے واضح کیا کہ اگر امریکا یا اسرائیل نے کسی قسم کی جارحیت کی تو اس کے اثرات صرف ایران تک محدود نہیں رہیں گے۔ انہوں نے کہا کہ ایسی صورت میں پورے خطے کی سلامتی خطرے میں پڑ سکتی ہے اور حالات قابو سے باہر ہو سکتے ہیں۔

ایرانی آرمی چیف کا کہنا تھا کہ دشمن کو یہ بات سمجھ لینی چاہیے کہ ایران کی دفاعی طاقت مضبوط ہے۔ انہوں نے خبردار کیا کہ کسی بھی حملے کی صورت میں صہیونی ریاست کی سلامتی بھی شدید خطرے سے دوچار ہو سکتی ہے۔ ایران اپنی خودمختاری اور قومی سلامتی پر کوئی سمجھوتہ نہیں کرے گا۔

جنرل امیر حاتمی نے ایران کے جوہری پروگرام پر بھی بات کی۔ انہوں نے کہا کہ ایران کی جوہری تنصیبات اور ٹیکنالوجی کو ختم کرنا ممکن نہیں۔ ان کے مطابق اگر قوم کے سائنسدان اور نوجوان شہید بھی ہو جائیں تب بھی ایران کی جوہری صلاحیت برقرار رہے گی۔