بھاٹی گیٹ سانحہ؛ خاتون اور بیٹی کی پوسٹ مارٹم رپورٹ نے کیس کا رخ موڑ دیا

بھاٹی گیٹ میں پیش آنے والے افسوسناک واقعے کی پوسٹ مارٹم رپورٹ منظرِ عام پر آنے کے بعد کیس نے نیا رخ اختیار کر لیا ہے۔

 سیوریج لائن میں گر کر جان کی بازی ہارنے والی خاتون اور اس کی کمسن بیٹی کے بارے میں رپورٹ میں ایسے انکشافات سامنے آئے ہیں جنہوں نے کئی سوالات کھڑے کر دیے ہیں۔

ذرائع کے مطابق پوسٹ مارٹم رپورٹ میں ماں اور بیٹی دونوں کے سروں پر چوٹ کے واضح نشانات پائے گئے ہیں۔ رپورٹ میں بتایا گیا ہے کہ خاتون سعدیہ کے دائیں کندھے کی ہڈی ٹوٹی ہوئی تھی، جبکہ 9 ماہ کی بچی ردا فاطمہ کی گردن کی ہڈی بھی فریکچر ہو چکی تھی۔ یہ انکشافات واقعے کی سنگینی کو مزید بڑھا دیتے ہیں۔

رپورٹ کے مطابق سعدیہ کی کمر پر بھی متعدد زخموں کے نشانات ملے ہیں۔ بتایا جا رہا ہے کہ خاتون نے اپنی بیٹی کو بچانے کے لیے سیوریج لائن میں چھلانگ لگائی تھی۔ ابتدائی شواہد کے مطابق دونوں کی موت سر اور گردن کی ہڈیوں کے ٹوٹنے کے باعث ہوئی۔

اطلاعات کے مطابق پوسٹ مارٹم ایک خاتون ڈاکٹر نے کیا ہے اور رپورٹ کو فی الحال سیل کر دیا گیا ہے۔ حکام کا کہنا ہے کہ رپورٹ کی روشنی میں مزید قانونی پہلوؤں کا جائزہ لیا جا رہا ہے۔