یوٹیلٹی اسٹورز کے ملازمین کیلئے بڑی خوشخبری آگئی

وزیراعظم شہباز شریف کی ہدایت پر یوٹیلٹی اسٹورز کے ملازمین کے لیے خصوصی مالی پیکیج کی منظوری دے دی گئی ہے۔ یہ فیصلہ ملازمین کی مالی سہولت اور حقوق کی حفاظت کے لیے کیا گیا ہے۔

معاون خصوصی برائے صنعت و پیداوار ہارون اختر کی زیر صدارت ایک اجلاس میں یوٹیلٹی اسٹورز کارپوریشن اور نیشنل ورکرز یونین کے درمیان معاہدہ طے پایا۔ اس معاہدے کے تحت متاثرہ ملازمین کو کمپنسیٹری پیکیج کے چیکس کی تقسیم کا عمل شروع کر دیا گیا ہے۔

اہل ملازمین کو پیکیج کی ادائیگی مرحلہ وار کی جائے گی۔ پہلے مرحلے میں 40 فیصد اور بعد میں 30-30 فیصد کی ادائیگیاں کی جائیں گی۔ اس کے علاوہ سال 2024 اور 2025 کے سالانہ انکریمنٹس بھی اس پیکیج میں شامل ہیں۔

ہارون اختر نے کہا کہ حکومت مالی تعاون فراہم کرے گی تاکہ تمام ملازمین کو بروقت ادائیگیاں یقینی بنائی جا سکیں۔ انہوں نے واضح کیا کہ حکومت اپنے مزدوروں کو تنہا نہیں چھوڑے گی اور ان کے حقوق کی مکمل حفاظت کی جائے گی۔