سونے اور چاندی سے متعلق بابا وانگا کی پیشگوئی وائرل

معروف بلغارین پیشگو بابا وانگا کی پیشگوئیاں ایک بار پھر دنیا بھر میں توجہ کا مرکز بن گئی ہیں۔ سوشل میڈیا اور عالمی میڈیا میں ان دعوؤں پر بحث جاری ہے، جن میں انہوں نے شدید عالمی مالی بحران کی پیشگوئی کی تھی۔

بابا وانگا کے مطابق مستقبل میں کاغذی کرنسی کی قدر میں نمایاں کمی آئے گی۔ ان کا کہنا تھا کہ ایسے حالات میں سونا، چاندی اور تانبا محفوظ سرمایہ کاری ثابت ہوں گے۔ ان پیشگوئیوں کے بعد کئی افراد نے اپنی جمع پونجی قیمتی دھاتوں میں منتقل کرنا شروع کر دی۔

گزشتہ چند ماہ کے دوران عالمی منڈی میں سونے اور چاندی کی قیمتوں میں غیر معمولی اضافہ دیکھنے میں آیا۔ مارکیٹ رپورٹس کے مطابق ایم سی ایکس پر سونے کی قیمت ایک وقت میں ایک لاکھ 80 ہزار روپے فی 10 گرام تک پہنچ گئی۔ ایک سال میں سونے کی قیمت میں تقریباً 70 فیصد اضافہ ریکارڈ کیا گیا۔

چاندی کی قیمت میں بھی زبردست تیزی دیکھنے میں آئی۔ چاندی ایک موقع پر 4 لاکھ روپے فی کلوگرام سے تجاوز کر گئی۔ ایک سال کے دوران چاندی نے سرمایہ کاروں کو 160 فیصد سے زائد منافع دیا، جس کے بعد اسے ایک مضبوط سرمایہ کاری سمجھا جانے لگا۔

ماہرین کا کہنا ہے کہ بابا وانگا کی پیشگوئیوں نے بھی سرمایہ کاروں کے رجحان کو متاثر کیا۔ غیر یقینی معاشی حالات کے خدشات کے باعث لوگوں نے قیمتی دھاتوں کو محفوظ راستہ سمجھا۔

تاہم 30 جنوری کے بعد صورتحال میں اچانک تبدیلی آئی۔ سونے اور چاندی کی قیمتوں میں ایک ہی دن میں واضح کمی دیکھی گئی۔ یہ گراوٹ مسلسل تین دن تک جاری رہی، جس سے سرمایہ کاروں میں تشویش پھیل گئی۔