اس بار کم سے کم صدقہ فطر اور روزے کا فدیہ کتنا ہوگا؟ اہم اعلان ہوگیا

متحدہ عرب امارات کی فتویٰ کونسل نے رمضان المبارک 2026 کے لیے صدقہ الفطر اور فدیہ کی سرکاری رقم کا اعلان کر دیا ہے۔ اس سلسلے میں وزارت اقتصادیات اور سیاحت کے ساتھ فیلڈ پرائس اسٹڈی بھی کی گئی تاکہ حقیقی مارکیٹ نرخوں کے مطابق رقوم مقرر کی جا سکیں۔

یو اے ای کونسل برائے فتویٰ کے مطابق ہر مسلمان مرد اور عورت جو مالی طور پر اہل ہو، پر صدقہ الفطر ادا کرنا واجب ہے۔ صدقہ الفطر کی رقم فی شخص 2.5 کلو چاول یا 25 درہم نقد مقرر کی گئی ہے۔

روزہ نہ رکھنے والوں کے لیے فدیہ ایک مسکین کو فی دن 3.25 کلو گندم یا 20 درہم فی شخص کھلانے کی مقدار رکھی گئی ہے۔ رمضان کے روزے کو باطل کرنے پر فدیہ 1,200 درہم ہے، جو 60 مستحق افراد میں تقسیم کیا جائے گا۔ اسی طرح حج یا عمرہ کے دوران ممنوعہ کاموں کے لیے فدیہ 120 درہم ہے جو چھ مستحقین میں بانٹا جائے گا۔

ایک افطار کے کھانے کی کم از کم قیمت 20 درہم مقرر کی گئی ہے۔ فتویٰ کونسل کے ترجمان نے عوام سے اپیل کی ہے کہ زکوٰۃ اور صدقہ کی ادائیگی منظور شدہ اداروں کے ذریعے کریں، جیسے کہ زکوٰۃ فنڈ، امارات ریڈ کریسنٹ یا دیگر تسلیم شدہ خیراتی ادارے۔

یہ ادائیگیاں رمضان کے دنوں میں اور عید الفطر کی صبح عید کی نماز سے پہلے کی جا سکتی ہیں۔ فتویٰ کونسل نے زور دیا کہ صدقہ الفطر مستحق افراد کو دینے سے معاشرے میں بھلائی اور تعاون کا جذبہ بڑھتا ہے۔