29 یا 30 ، اس سال رمضان میں کتنے روزے ہوں گے؟ اہم خبر آگئی

فلکیاتی ماہرین نے رواں سال رمضان المبارک کے آغاز کے حوالے سے اہم پیش گوئی کی ہے۔ ماہرین کے مطابق اسلامی ممالک میں رمضان کے آغاز کی تاریخ مختلف ہو سکتی ہے۔ اس فرق کی وجہ چاند دیکھنے کے طریقہ کار اور جغرافیائی محلِ وقوع کو قرار دیا جا رہا ہے۔

ماہرین کا کہنا ہے کہ اس بات کا حتمی فیصلہ ابھی نہیں ہو سکا کہ رمضان المبارک 29 دن کا ہو گا یا 30 دن کا۔ مختلف ممالک میں چاند نظر آنے کے امکانات الگ الگ ہیں، جس کے باعث روزے کے آغاز میں فرق پڑ سکتا ہے۔

عرب یونین برائے فلکیات و خلائی سائنسز کے رکن اور امارات فلکیاتی سوسائٹی کے چیئرمین ابراہیم الجروان کے مطابق رمضان المبارک کے چاند کی پیدائش منگل 17 فروری کو ہو گی۔ یہ پیدائش پاکستانی وقت کے مطابق شام کے وقت متوقع ہے۔

انہوں نے بتایا کہ چاند کی پیدائش کے فوراً بعد اس کا غروب ہو جانا انسانی آنکھ سے چاند دیکھنے کو انتہائی مشکل بنا دے گا۔ اسی وجہ سے 17 فروری کو چاند نظر آنے کے امکانات نہ ہونے کے برابر ہیں۔

ابراہیم الجروان کے مطابق بدھ 18 فروری کی شام چاند کے واضح طور پر نظر آنے کا قوی امکان ہے۔ اگر ایسا ہوا تو بیشتر ممالک میں پہلا روزہ جمعرات 19 فروری کو رکھا جائے گا۔

ماہرین کا کہنا ہے کہ حتمی اعلان ہمیشہ مقامی رویتِ ہلال کمیٹیوں کی جانب سے کیا جاتا ہے۔ تاہم فلکیاتی حسابات کے مطابق زیادہ تر اسلامی ممالک میں رمضان المبارک کا آغاز 19 فروری سے ہونے کی توقع ہے۔