ایران اور امریکہ کے درمیان فی الحال فوجی تصادم کا خطرہ نہیں : ترک وزیر خارجہ

انقرہ: ترکی کے وزیر خارجہ ہاکان فیدان نے کہا ہے کہ ایران اور امریکہ کے درمیان فوری طور پر کسی فوجی تصادم کا خطرہ موجود نہیں، تاہم خطے کی صورتِ حال اب بھی حساس اور نازک ہے۔ انہوں نے زور دیا کہ حالیہ سفارتی رابطوں کے بعد ایک نسبتاً مثبت فضا بنی ہے، جسے آگے بڑھانے کے لیے تخلیقی اور تعمیری سفارتکاری ناگزیر ہے۔

ایک براہِ راست نشریاتی پروگرام میں گفتگو کرتے ہوئے فیدان نے کہا کہ انقرہ ایران اور امریکہ کے درمیان جاری رابطوں کو انتہائی اہمیت دیتا ہے اور اسے خطے میں استحکام کے لیے ایک مثبت پیش رفت سمجھتا ہے۔

انہوں نے کہا کہ ہمیں ایک تخلیقی حل تلاش کرنا ہوگا، اور ہمیں نظر آ رہا ہے کہ دونوں فریق مسئلے کو پرامن طریقے سے حل کرنے کی خواہش رکھتے ہیں۔ فی الحال کم از کم فوری جنگ کا کوئی خطرہ دکھائی نہیں دیتا۔

فیدان نے تصدیق کی کہ دو روز قبل عمان میں ایرانی اور امریکی حکام کے درمیان غیر معمولی نوعیت کے مذاکرات ہوئے۔ انہوں نے کہا کہ ایران کے وزیر خارجہ عباس عراقچی نے ان ملاقاتوں سے متعلق تفصیلات سے دیگر فریقوں کو بھی آگاہ کیا۔ اگرچہ جنگ قریب دکھائی نہیں دیتی، لیکن علاقائی حرکیات (ڈائنامکس) اب بھی کشیدہ ہیں۔

ترک وزیر خارجہ نے اس بات کی نشاندہی کی کہ امریکہ کی جانب سے حالیہ دنوں میں خطے میں بڑے بحری بیڑوں، بمبار طیاروں اور اسٹریٹجک عسکری وسائل کی تعیناتی کی گئی ہے، جو کشیدگی کی شدت کو ظاہر کرتی ہے۔ دوسری جانب ایران نے سفارتکاری کی حمایت جاری رکھتے ہوئے کسی بھی ممکنہ جارحیت کے مقابلے کے لیے اپنی عسکری اور میزائل طاقت کا کھل کر اظہار کیا ہے۔

ان کا کہنا تھا کہ یہ طاقت کے اظہار اور ہر ممکن صورتحال کے لیے تیاری کا معاملہ ہے۔ کسی بھی تصادم کی صورت میں اس کی قیمت تمام فریقوں کو بھگتنا پڑے گی۔

انہوں نے واضح کیا کہ ایران سے متعلق معاملہ ترکی کی خارجہ پالیسی کی اولین ترجیحات میں شامل ہے اور انقرہ کسی بھی صورت خطے میں نئی جنگ کے آغاز کو روکنا چاہتا ہے۔ فیدان کے مطابق صدر رجب طیب اردوان اس معاملے کو ذاتی طور پر قریب سے دیکھ رہے ہیں۔

ہاکان فیدان نے بتایا کہ انہوں نے جوہری مسئلے پر ترکی کا مؤقف ایران اور امریکہ دونوں تک پہنچایا ہے اور ایک ایسا سفارتی فریم ورک تجویز کیا ہے جس سے پیش رفت کی راہ ہموار ہو سکے۔

ان کا کہنا تھا کہ موجودہ حالات میں سفارتکاری ہی وہ واحد راستہ ہے جو خطے کو ایک ممکنہ تباہ کن جنگ سے بچا سکتا ہے، اور اسی مقصد کے تحت ترکی فعال کردار ادا کر رہا ہے۔