سولر نیٹ میٹرنگ قوانین میں تبدیلی کے حوالے سے بڑی خبر آگئی

عوامی ردِعمل سامنے آنے کے بعد حکومت نے سولر نیٹ میٹرنگ کے قوانین پر دوبارہ غور شروع کر دیا ہے۔

ذرائع کے مطابق پاور ڈویژن نے نیپرا کو باقاعدہ درخواست ارسال کی ہے کہ نئے مجوزہ قواعد پر نظرثانی کی جائے۔ اس اقدام کا مقصد سولر استعمال کرنے والے موجودہ صارفین کو ریلیف دینا ہے۔ حکومت کا مؤقف ہے کہ جن صارفین نے پہلے سے نیٹ میٹرنگ کے تحت معاہدے کیے ہوئے ہیں، ان کی شرائط میں تبدیلی نہ کی جائے۔ یونٹ کے بدلے یونٹ کا طریقہ کار برقرار رکھا جائے۔

پاور ڈویژن نے نیپرا میں دائر درخواست میں کہا ہے کہ پرانے صارفین نے بڑی سرمایہ کاری سے سولر سسٹم لگایا ہے۔ اچانک قوانین بدلنے سے انہیں مالی نقصان ہو سکتا ہے۔ اسی لیے ان کے لیے پرانے ضوابط ہی نافذ رہنے چاہییں۔ ذرائع کے مطابق نئی پالیسی پر عوام کی جانب سے شدید تحفظات سامنے آئے تھے۔ صارفین کا کہنا تھا کہ نیٹ بلنگ کی طرف منتقلی سے سولر لگانے کا فائدہ کم ہو جائے گا۔

اس معاملے پر وزیراعظم نے بھی نوٹس لیا تھا۔ انہوں نے پاور ڈویژن کو ہدایت دی تھی کہ نیپرا میں نظرثانی کی درخواست دی جائے۔