پیٹرولیم مصنوعات میں بڑے اضافے کے بعد بجلی اور گیس کی قیمتوں سے متعلق سخت فیصلہ

پاور ڈویژن نے مستقبل میں سبسڈی کے حوالے سے ایک جامع پلان تیار کر لیا ہے۔

پلان کے مطابق عام صارفین سے بجلی اور گیس کی پوری قیمت وصول کی جائے گی۔ صرف مستحق صارفین کو بے نظیر انکم اسپورٹس پروگرام (BISP) کے تحت سبسڈی دی جائے گی۔

ذرائع کے مطابق پاور ڈویژن نے بی آئی ایس پی کے ساتھ مل کر مستحق صارفین کا ڈیٹا اکٹھا کرنا شروع کر دیا ہے۔ اس سے یہ یقینی بنایا جائے گا کہ سبسڈی صرف مستحق افراد تک محدود رہے، جبکہ دیگر صارفین پر اضافی بوجھ نہیں آئے گا۔

ذرائع نے بتایا کہ گیس کے شعبے میں بھی کراس سبسڈی ختم کر دی جائے گی۔ موجودہ بجٹ میں گیس شعبے کی کراس سبسڈی 225 ارب روپے ہے، جسے آئندہ بجٹ میں محدود کرنے کی تیاری کی جا رہی ہے۔

یہ اقدامات پاکستان اور عالمی مالیاتی ادارے (IMF) کے درمیان تیسرے اقتصادی جائزہ مذاکرات کے پیش نظر کیے جا رہے ہیں۔ IMF کا جائزہ مشن 25 فروری کو پاکستان کا دورہ کرے گا اور تقریباً دو ہفتے قیام کرے گا۔ مشن جولائی تا دسمبر 2025 کے دوران معاشی کارکردگی، ٹیکس اصلاحات، توانائی شعبے، مانیٹری پالیسی اور زرمبادلہ کے ذخائر کا تفصیلی جائزہ لے گا۔