اپنا گھر بنانے کے خواہشمند افراد کیلئے بڑی خوشخبری

اقتصادی رابطہ کمیٹی کے حالیہ اجلاس میں عوام کے لیے ہاؤسنگ اور توانائی کے شعبے سے متعلق بڑے فیصلے کیے گئے ہیں۔

اجلاس کی صدارت وزیر خزانہ محمد اورنگزیب نے کی۔ اجلاس میں کم لاگت گھروں کے منصوبے کو وسعت دینے پر اتفاق ہوا۔ حکام نے بتایا کہ “میرا گھر میرا آشیانہ” اسکیم کے تحت قرض کی حد بڑھا دی گئی ہے۔ اب اس اسکیم میں ایک کروڑ روپے تک قرض حاصل کیا جا سکے گا۔ اس اقدام کا مقصد متوسط طبقے کو اپنا گھر بنانے میں سہولت دینا ہے۔

اجلاس میں یہ بھی طے کیا گیا کہ سستی ہاؤسنگ اسکیم کے تمام صارفین کے لیے سود کی شرح 5 فیصد مقرر کی جائے گی۔ اس فیصلے کا اطلاق نئے اور پرانے دونوں قرضوں پر ہوگا۔ پہلے سے جاری قرضے بھی اب کم شرح سود پر منتقل کیے جائیں گے۔ حکام کے مطابق اس سے قرض لینے والوں کا مالی بوجھ کم ہوگا۔ مزید افراد کو بینکوں سے قرض لینے کی ترغیب ملے گی۔

اقتصادی رابطہ کمیٹی نے توانائی کے شعبے کے لیے بھی مالی معاونت کی منظوری دی۔ تھر کول ریل لنک منصوبے کے لیے 6.6 ارب روپے کی تکنیکی گرانٹ منظور کی گئی ہے۔ اس منصوبے سے مقامی کوئلے کی پاور پلانٹس تک ترسیل آسان ہوگی۔ اس سے بجلی کی پیداوار میں بہتری آنے کی توقع ہے۔ حکومت کا کہنا ہے کہ اس قدم سے ایندھن کی لاگت میں کمی ہو سکتی ہے۔

زرعی شعبے کے لیے بھی فنڈز مختص کیے گئے ہیں۔ بارانی علاقوں میں کاشتکاری بہتر بنانے کے لیے 7.8 ملین روپے کی گرانٹ منظور کی گئی ہے۔ اس رقم سے پانی کے بہتر استعمال اور جدید طریقوں کو فروغ دیا جائے گا۔ حکام کا کہنا ہے کہ اس سے دیہی معیشت کو سہارا ملے گا۔ کسانوں کی آمدن میں اضافہ متوقع ہے۔