عید الفطر کب ہوگی؟ ممکنہ تاریخ سامنے آگئی

خلیجی ممالک میں عید الفطر کے حوالے سے العجیری سائنٹیفک سینٹر نے اپنی تازہ پیشگوئی جاری کر دی ہے۔

العجیری سائنٹیفک سینٹر کے مطابق فلکیاتی حساب کتاب کے مطابق بدھ، 18 مارچ 2026 (29 رمضان المبارک) کی شام کو ماہ شوال کا چاند نظر آنے کا امکان نہیں ہے۔ سینٹر نے بتایا کہ اس دن کویت اور دیگر ممالک میں چاند غروب آفتاب سے پہلے ہی ڈوب جائے گا، جس کی وجہ سے رویتِ ہلال ممکن نہیں ہوگی۔

سینٹر کے مطابق نئے چاند کی پیدائش جمعرات، 19 مارچ کو کویتی وقت کے مطابق صبح تقریباً 4:23 بجے ہوگی۔ چونکہ یہ وقت رویت کے دن کے غروب آفتاب کے بعد ہے، اس لیے پہلی رات چاند دیکھنا ممکن نہیں ہوگا۔

ان نتائج کی بنیاد پر امکان ظاہر کیا جا رہا ہے کہ رمضان المبارک کے 30 دن مکمل ہوں گے۔ جمعرات، 19 مارچ غالباً رمضان کا آخری دن ہوگا، اور جمعہ، 20 مارچ 2026 کو عید الفطر منانے کا قوی امکان ہے۔

العجیری سائنٹیفک سینٹر نے زور دیا کہ ہجری مہینوں کی ابتدا اور عید کا باضابطہ اعلان صرف مجاز حکام کریں گے، جو شرعی رویت کے طریقہ کار کے مطابق فیصلے کریں گے۔