کیا پیٹرولیم مصنوعات کی قیمتوں میں مزید اضافہ ہو گا؟ اہم خبر آگئی

سوشل میڈیا پر پیٹرول اور ڈیزل کی قیمتوں میں بڑے اضافے سے متعلق گردش کرنے والی خبروں پر اوگرا نے وضاحت جاری کر دی ہے۔

 ترجمان اوگرا نے کہا کہ ادارے کی جانب سے پیٹرول کی قیمت میں 73.40 روپے اور ڈیزل کی قیمت میں 84.95 روپے فی لیٹر اضافے کی کوئی سمری وزیرِ اعظم آفس کو نہیں بھیجی گئی۔ اس حوالے سے سوشل میڈیا پر پھیلائی گئی اطلاعات بے بنیاد ہیں۔

ترجمان کے مطابق بعض غیر مصدقہ ذرائع نے پیٹرولیم مصنوعات کی قیمتوں میں بڑے اضافے کی خبریں پھیلائیں، جس کے بعد عوام میں تشویش پیدا ہوئی۔ اس وقت ایسی کسی تجویز پر عملدرآمد نہیں ہو رہا اور نہ ہی اس طرح کی کوئی سمری حکومت کو بھیجی گئی ہے۔

انہوں نے عوام سے اپیل کی کہ وہ سوشل میڈیا پر چلنے والی ہر خبر پر یقین نہ کریں۔ صرف مستند اور سرکاری ذرائع سے جاری ہونے والی معلومات کو ہی درست سمجھا جائے۔