عیدالفطر کب ہو گی؟ بڑی پیشگوئی سامنے آگئی

بین الاقوامی فلکیاتی مرکز نے شوال کے چاند کے بارے میں نئی پیشگوئی جاری کردی ہے۔

ماہرین فلکیات کے مطابق اس سال کئی ممالک میں چاند کی رویت کے حوالے سے صورتحال مختلف ہو سکتی ہے۔ وہ ممالک جہاں پہلا روزہ بدھ 18 فروری کو رکھا گیا تھا، وہاں شوال کا چاند بدھ 18 مارچ کو تلاش کیا جائے گا۔ اسی طرح جن ممالک میں پہلا روزہ جمعرات 19 فروری کو رکھا گیا تھا، وہاں چاند دیکھنے کی کوشش 19 مارچ کو کی جائے گی۔

ماہرین کا کہنا ہے کہ جن علاقوں میں 18 مارچ کو چاند دیکھنے کی کوشش کی جائے گی وہاں اس دن چاند نظر آنا ممکن نہیں ہوگا۔ اس کی وجہ یہ بتائی گئی ہے کہ اس دن چاند سورج سے پہلے غروب ہو جائے گا۔

 اس کے علاوہ چاند اور سورج کا اجتماع بھی سورج غروب ہونے کے بعد ہوگا۔ اس صورتحال کے باعث ان ممالک میں عیدالفطر 20 مارچ کو ہونے کا امکان ظاہر کیا جا رہا ہے۔

فلکیاتی مرکز کے مطابق 19 مارچ کو بھی دنیا کے کئی حصوں میں شوال کا چاند دیکھنا آسان نہیں ہوگا۔ خاص طور پر مشرقی اور وسطی علاقوں میں چاند نظر آنے کے امکانات بہت کم ہوں گے۔ اسی وجہ سے ان علاقوں میں عیدالفطر 21 مارچ کو ہونے کا امکان ظاہر کیا گیا ہے۔

ماہرین فلکیات کا کہنا ہے کہ چاند کی حتمی رویت کا اعلان متعلقہ ممالک کی رویت ہلال کمیٹیوں کی جانب سے کیا جاتا ہے۔ تاہم فلکیاتی اندازے عام طور پر چاند کی پیدائش اور اس کے نظر آنے کے امکانات کے بارے میں پیشگی معلومات فراہم کرتے ہیں۔