ملازمین کیلئے بڑی خوشخبری؛ ریٹائرمنٹ کے بعد ماہانہ آمدن حاصل کرنے کی نئی اسکیم متعارف

سیکیورٹیز اینڈ ایکسچینج کمیشن آف پاکستان (ایس ای سی پی) نے ریٹائرمنٹ کے بعد مستقل آمدن کے لیے نئے مالیاتی نظام کی منظوری دے دی ہے۔

 نئے مالیاتی نظام کے تحت ملازمین اپنی جمع شدہ بچت کو ایک باقاعدہ ماہانہ آمدن میں تبدیل کر سکیں گے۔ اس اقدام کا مقصد ریٹائرڈ افراد کو مالی استحکام فراہم کرنا اور ان کی آمدنی کو یقینی بنانا ہے۔

ایس ای سی پی کا کہنا ہے کہ نئی منظور شدہ اینیوٹی مصنوعات کے ذریعے ریٹائر ہونے والے افراد کو عمر بھر یا مقررہ مدت تک مستقل ادائیگی حاصل ہو سکے گی۔ ان مصنوعات میں لائف کنٹنجنٹ، ڈیفرڈ اور گارنٹیڈ پیمنٹ اینیوٹیز شامل ہیں۔ یہ نظام اس طرح تیار کیا گیا ہے کہ افراد اپنی بچت کو ایک منظم طریقے سے ماہانہ قسطوں میں وصول کر سکیں۔

حکام کے مطابق یہ ہائبرڈ اسکیمیں بڑھتی ہوئی مہنگائی اور اوسط عمر میں اضافے جیسے چیلنجز کے پیش نظر متعارف کروائی گئی ہیں۔ ان کا مقصد بزرگ شہریوں کو مالی دباؤ سے بچانا اور انہیں ایک بااعتماد آمدنی کا ذریعہ فراہم کرنا ہے۔ اس نظام سے ریٹائرمنٹ کے بعد غیر یقینی صورتحال میں کمی آئے گی۔

نئی اینیوٹی مصنوعات روایتی انشورنس ماڈل کے ساتھ ساتھ اسلامی مالیاتی نظام یعنی تکافل کے تحت بھی دستیاب ہوں گی۔ اس سے مختلف ترجیحات رکھنے والے افراد کو اپنی سہولت کے مطابق انتخاب کا موقع ملے گا۔ اس اقدام سے ملک کا ریٹائرمنٹ سسٹم مزید مضبوط ہوگا۔