لیسکو نے مارکیٹ سے اے ایم آئی اسمارٹ سنگل فیز میٹر کی خریداری پر پابندی عائد کر دی

لاہور الیکٹرک سپلائی کمپنی نے اسمارٹ بجلی میٹر سے متعلق اہم فیصلہ کر لیا ہے۔

 کمپنی نے مارکیٹ سے اے ایم آئی اسمارٹ سنگل فیز میٹر کی خریداری پر پابندی عائد کر دی ہے۔ اب صارفین کو میٹر صرف لیسکو کے ذریعے ہی حاصل کرنا ہوگا۔ اس اقدام کا مقصد نظام کو بہتر بنانا اور بے ضابطگیوں کو روکنا بتایا جا رہا ہے۔

لیسکو حکام کے مطابق سنگل فیز اسمارٹ میٹر کی قیمت 11,666 روپے مقرر کی گئی ہے۔ اس کے علاوہ سیکیورٹی چارجز بھی صارفین کو الگ سے ادا کرنا ہوں گے۔ تمام ادائیگیاں مقررہ طریقہ کار کے تحت کی جائیں گی تاکہ شفافیت برقرار رہے۔

حکام نے بتایا کہ صارفین کی بجلی کی ضرورت کے مطابق ڈیمانڈ نوٹس جاری کیے جائیں گے۔ اس کے بعد میٹر کی تنصیب کا عمل شروع کیا جائے گا۔ اس نئے نظام کے تحت میٹر کی فراہمی اور تنصیب دونوں مراحل لیسکو کے زیر نگرانی ہوں گے۔ اس سے صارفین کو ایک ہی جگہ سے مکمل سہولت ملے گی۔

یاد رہے کہ اس سے قبل میٹرز کی کمی کے باعث خریداری کا عمل آؤٹ سورس کیا گیا تھا۔ اس پالیسی کے تحت صارفین کو این او سی جاری کیا جاتا تھا۔ جس کے بعد وہ مارکیٹ سے خود میٹر خرید سکتے تھے۔ تاہم اب اس طریقہ کار کو ختم کر دیا گیا ہے۔