پاکستان سے بیرون ملک جانیوالے مسافروں کیلئے اچھی خبر آگئی

پاکستان اور مشرقِ وسطیٰ کے درمیان فضائی آپریشن میں آہستہ آہستہ بہتری آنا شروع ہو گئی ہے۔ یہ پیش رفت بیرون ملک سفر کرنے والے پاکستانیوں کے لیے خوش آئند ہے۔ تاہم ابھی بھی کئی ایئرپورٹس سے پروازوں کی منسوخی جاری ہے، جس کی وجہ سے مسافروں کو مشکلات کا سامنا کرنا پڑ رہا ہے۔

ذرائع کے مطابق ملک بھر کے مختلف شہروں سے مشرقِ وسطیٰ جانے والی تقریباً 40 پروازیں منسوخ کی گئی ہیں۔ سکیورٹی خدشات اور آپریشنل مسائل کے باعث فلائٹ شیڈول متاثر ہوا ہے۔ اس صورتحال نے خاص طور پر ان مسافروں کو متاثر کیا ہے جن کے سفری منصوبے پہلے سے طے تھے۔

دوسری جانب فلائٹ آپریشن کی جزوی بحالی کے آثار بھی سامنے آ رہے ہیں۔ العین سے لاہور، اسلام آباد اور پشاور کے لیے مجموعی طور پر 10 پروازوں کی آمد متوقع ہے۔ اسی طرح دوحہ سے کراچی، لاہور اور اسلام آباد کے لیے پروازوں کے معمول کے مطابق چلنے کا امکان ظاہر کیا گیا ہے، جس سے مسافروں کو کچھ ریلیف ملنے کی امید ہے۔

روانگی کے حوالے سے صورتحال ابھی مکمل طور پر بہتر نہیں ہو سکی۔ کراچی سے دوحہ، بحرین، ابوظبی اور دبئی کے لیے 13 پروازیں منسوخ کی گئی ہیں۔ لاہور سے 8، اسلام آباد سے 7، پشاور سے 10 جبکہ ملتان سے 2 پروازیں متاثر ہونے کی اطلاعات ہیں۔