سعودی عرب ہمیشہ عالمِ اسلام کی خدمت کیلئے اپنا کردار ادا کرتا رہے گا، خادم الحرمین الشریفین

خادم الحرمین الشریفین شاہ سلمان بن عبدالعزیز کا کہنا ہے کہ سعودی عرب ہمیشہ عالمِ اسلام کی خدمت کیلئے اپنا کردار ادا کرتا رہے گا۔

خادم الحرمین الشریفین شاہ سلمان بن عبدالعزیز نے عید الفطر کے موقع پر عالمِ اسلام کو خصوصی مبارکباد پیش کی ہے۔ اپنے پیغام میں انہوں نے عالمی امن، سلامتی اور استحکام کے لیے سعودی عرب کی جاری کوششوں پر زور دیا۔

سعودی فرمانروا کا یہ پیغام ان کے ترجمان سلمان الدوسری نے پڑھ کر سنایا۔ شاہ سلمان نے دعا کی کہ اللہ تعالیٰ ہمارے تمام نیک اعمال کو قبول فرمائے اور ہمیں مزید بھلائی کے کام کرنے کی توفیق عطا کرے۔ انہوں نے اپنے پیغام میں ملک اور پوری ملتِ اسلامیہ کے لیے امن و سلامتی کی دعا بھی کی۔

شاہ سلمان نے حرمین شریفین کی دیکھ بھال اور زائرین کی خدمت کے عزم کا اعادہ کیا۔ انہوں نے کہا کہ سعودی عرب ہمیشہ عالمِ اسلام کی خدمت اور اتحاد کے فروغ کے لیے اپنا کردار ادا کرتا رہے گا۔