دنیا بھر میں خام تیل اور گیس کی قیمتوں میں اضافہ

مشرق وسطیٰ میں آئل اور گیس کی تنصیبات پر حالیہ حملوں کے بعد دنیا بھر میں خام تیل اور گیس کی قیمتوں میں نمایاں اضافہ دیکھا گیا ہے۔

عالمی مارکیٹ میں برینٹ خام تیل کی قیمت 119 ڈالر فی بیرل تک جاکر نیچے آئی اور 106 ڈالر فی بیرل پر تجارت کر رہی ہے۔ اسی دوران ڈبلیو ٹی آئی کی قیمت بھی 93 ڈالر فی بیرل سے تجاوز کر گئی۔

یورپ اور برطانیہ میں بھی گیس کی قیمتوں میں اضافہ ہوا ہے۔ برطانیہ میں گیس کی قیمتیں تقریباً 35 فیصد بڑھ گئی ہیں، جبکہ ایران پر مبنی جنگ کے بعد یورپ میں گیس کی قیمتیں تقریباً دوگنی ہو چکی ہیں۔

دوسری جانب ایران کے وزیر خارجہ عباس عراقچی نے کہا ہے کہ ایران نے اپنی غیر فوجی تنصیبات پر اسرائیلی حملے کے جواب میں محدود طاقت کا مظاہرہ کیا۔

انہوں نے عالمی برادری کو یقین دلایا کہ ایران نے تحمل کا مظاہرہ کیا ہے، لیکن اگر بنیادی ڈھانچے پر دوبارہ حملہ کیا گیا تو ایران مزید تحمل نہیں کرے گا۔

عباس عراقچی نے کہا کہ جنگ کا خاتمہ چاہے کسی بھی انداز میں ہو، شہری علاقوں میں ہونے والے نقصانات کا ازالہ لازمی ہوگا۔