گاڑیوں کے شوقین پاکستانیوں کیلئے بڑی خبر آگئی

پاکستان میں پیٹرولیم مصنوعات کی بڑھتی ہوئی قیمتوں کے بعد گاڑیوں کے انتخاب میں نمایاں تبدیلی دیکھنے میں آ رہی ہے۔ صارفین اب زیادہ تر پلگ اِن ہائبرڈ اور رینج ایکسٹینڈڈ گاڑیوں کی طرف مائل ہو رہے ہیں کیونکہ یہ کم لاگت اور ماحول دوست متبادل کے طور پر سامنے آئی ہیں۔

پیٹرول کی قیمت 320 روپے فی لیٹر سے تجاوز کرنے کے بعد عام صارفین کے لیے روایتی اسپورٹس یوٹیلیٹی وہیکل (SUV) کا چلانا مہنگا ہو گیا ہے۔ آٹو انڈسٹری کے ماہرین کے مطابق پلگ اِن ہائبرڈ الیکٹرک وہیکلز (PHEV) اور رینج ایکسٹینڈڈ گاڑیاں شہری اور طویل فاصلے کے سفر کے لیے زیادہ موزوں ہو گئی ہیں۔

چیری ماسٹر پاکستان کے ڈائریکٹر سیلز اینڈ مارکیٹنگ سید آصف احمد کا کہنا ہے کہ بڑھتی ہوئی پیٹرول قیمتوں نے روایتی گاڑیوں کی افادیت پر براہ راست اثر ڈالا ہے۔ ان کے مطابق صارفین اب صرف ماحولیاتی پہلو کی بنیاد پر نہیں بلکہ ماہانہ اخراجات کی وجہ سے بھی اپنی ترجیحات بدل رہے ہیں۔

اعداد و شمار کے مطابق ایک عام سی-سیگمنٹ کی پیٹرول SUV جو تقریباً 10 کلومیٹر فی لیٹر مائلیج دیتی ہے، اس وقت فی کلومیٹر 32 روپے لاگت پیدا کرتی ہے۔ جبکہ روایتی ہائبرڈ گاڑیاں 18 کلومیٹر فی لیٹر مائلیج دیتی ہیں اور ان کی فی کلومیٹر لاگت تقریباً 18 روپے بنتی ہے۔

اصل ترقی پلگ اِن ہائبرڈ اور رینج ایکسٹینڈڈ SUV میں دیکھنے کو مل رہی ہے، جو زیادہ تر سفر بجلی پر مکمل کر سکتی ہیں۔ ایک جدید پلگ اِن SUV کو مکمل چارج کرنے پر تقریباً 170 کلومیٹر چلایا جا سکتا ہے۔ اگر بجلی کی اوسط قیمت 50 روپے فی یونٹ رکھی جائے تو ایک مکمل چارج کی لاگت تقریباً 1700 روپے بنتی ہے، یعنی فی کلومیٹر تقریباً 10 روپے۔

ماہرین کے مطابق اس طرح پلگ اِن ہائبرڈ SUV کی روزانہ چلانے کی لاگت روایتی پیٹرول گاڑی کے مقابلے میں تقریباً 22 روپے فی کلومیٹر کم ہو سکتی ہے، جو ماہانہ بچت میں نمایاں اضافہ کرتی ہے۔