سونے کی قیمت میں اضافے کے بعد ایک بار پھر بڑی کمی

عالمی منڈی میں سونے کی قیمتوں میں نمایاں کمی ریکارڈ کی گئی ہے۔

ماہرین کا کہنا ہے کہ اس کی بڑی وجہ تیل کی بڑھتی ہوئی قیمتیں اور امریکی ڈالر کی مضبوطی ہے۔ اسپاٹ گولڈ 0.6 فیصد گر کر 4,466 ڈالر فی اونس پر آ گیا ہے۔ ماہانہ بنیاد پر سونا 15 فیصد سے زائد کم ہوا، جو 2008 کے بعد سب سے بڑی کمی ہے۔

تجزیہ کاروں کے مطابق بڑھتی ہوئی توانائی کی قیمتیں مہنگائی کے خدشات کو بڑھا رہی ہیں، جس سے فیڈرل ریزرو کی جانب سے شرح سود میں کمی کے امکانات کمزور ہو گئے ہیں۔

 سرمایہ کار اب سونے میں سرمایہ کاری کے لیے زیادہ محتاط رویہ اختیار کر رہے ہیں، کیونکہ بلند شرح سود غیر منافع بخش اثاثوں جیسے سونے کی طلب کم کر دیتی ہے۔

تیل کی قیمتیں بھی اس صورتحال کو متاثر کر رہی ہیں۔ برینٹ کروڈ آئل 115 ڈالر فی بیرل سے تجاوز کر گیا، جس کی بڑی وجہ یمن میں حوثی گروپ کے حملے اور مشرق وسطیٰ میں بڑھتی کشیدگی ہے۔ مارچ کے دوران تیل کی قیمتوں میں تقریباً 60 فیصد اضافہ ریکارڈ کیا گیا۔

دوسری دھاتوں کی قیمتوں میں بھی اتار چڑھاؤ دیکھا گیا۔ چاندی 1.3 فیصد سستی ہوئی، جبکہ پلاٹینم اور پیلیڈیم کی قیمتوں میں معمولی اضافہ ہوا۔ سرمایہ کار مارکیٹ میں محتاط رویہ اختیار کر کے اس سال شرح سود میں ممکنہ کمی کے اثرات کا انتظار کر رہے ہیں۔