برطانوی وزیر اعظم نے مہنگائی سے نمٹنے کیلئے تنخواہوں میں اضافے کا اعلان کردیا

ایران امریکا جنگ کے اثرات اب عالمی معیشت پر واضح نظر آنے لگے ہیں۔ اسی تناظر میں برطانیہ نے بڑھتی مہنگائی سے نمٹنے کے لیے اہم اقدامات کا آغاز کر دیا ہے۔

برطانوی وزیراعظم کیئر اسٹارمر نے حالیہ اجلاس میں معاشی صورتحال کا تفصیلی جائزہ لیا۔ اس موقع پر توانائی، انشورنس اور شپنگ کمپنیوں کے نمائندوں سے بھی مشاورت کی گئی۔ بعد ازاں ایک ہنگامی اجلاس منعقد ہوا جس میں عالمی حالات اور ان کے اثرات پر غور کیا گیا۔

حکومت کی جانب سے اعلان کیا گیا ہے کہ نیشنل لیونگ ویج میں اضافہ کیا جا رہا ہے، جس کے نتیجے میں لاکھوں ملازمین کی آمدن میں اضافہ ہوگا۔ اس فیصلے سے تقریباً 24 لاکھ افراد کو سالانہ اضافی رقم ملے گی۔ اسی طرح کم از کم اجرت میں بھی اضافہ کیا گیا ہے، جس سے نوجوان ملازمین کو بھی مالی فائدہ پہنچے گا۔

دوسری جانب توانائی کے بلوں میں بھی کمی کا اعلان کیا گیا ہے۔ حکومتی منصوبے کے تحت سالانہ بنیاد پر اوسط بل میں نمایاں کمی کی جائے گی، جس کا اطلاق آئندہ چند ماہ میں شروع ہو جائے گا۔ اس کے علاوہ ادویات کی قیمتوں کو بھی عارضی طور پر منجمد کر دیا گیا ہے تاکہ عوام کو مزید ریلیف مل سکے۔

وزیراعظم اسٹارمر نے کہا کہ ایران جنگ کے باعث عالمی منڈی میں قیمتیں بڑھ رہی ہیں اور عوام میں تشویش پائی جاتی ہے۔ تاہم حکومت ہر ممکن کوشش کر رہی ہے کہ مہنگائی کو قابو میں رکھا جائے۔ عالمی سطح پر اہم بحری راستوں کو کھلا رکھنا ضروری ہے تاکہ اشیاء کی ترسیل متاثر نہ ہو اور قیمتوں میں استحکام آ سکے۔