توانائی بحران؛ گیس بندش کا نیا شیڈول سامنے آگیا

کراچی کے مختلف علاقوں میں گیس کی لوڈشیڈنگ کا نیا شیڈول نافذ کر دیا گیا ہے جس کے باعث شہریوں کو صبح اور شام کے اوقات میں مشکلات کا سامنا ہے۔

 ذرائع کے مطابق شہر کے کئی حصوں میں صبح 10 بجے سے دوپہر 12 بجے تک گیس بند رکھی جائے گی، جبکہ شام کے وقت 3 بجے سے 6 بجے تک بھی سپلائی معطل رہے گی۔

سوئی سدرن ذرائع کا کہنا ہے کہ رات کے اوقات میں بھی گیس کی بندش جاری رہے گی۔ رات 10 بجے سے صبح 5:30 بجے تک گیس فراہم نہیں کی جائے گی۔ اس طویل دورانیے کی بندش کی وجہ سے گھریلو صارفین کو خاصی پریشانی کا سامنا ہے، خاص طور پر کھانا پکانے کے اوقات میں مسائل بڑھ گئے ہیں۔

شہر کے مختلف علاقوں میں گیس کی فراہمی پہلے ہی متاثر ہے۔ ایف بی ایریا اور نارتھ ناظم آباد کے کئی بلاکس میں گیس کی سپلائی معطل رہی، جس سے صبح کے وقت شہریوں کو مشکلات پیش آئیں۔ اسی طرح ملیر، کھوکھراپار، لانڈھی، اورنگی ٹاؤن اور نارتھ کراچی میں بھی گیس کی کمی یا بندش کی شکایات سامنے آئیں۔

دیگر علاقوں جیسے گلشن اقبال، ناظم آباد، گارڈن اور لیاقت آباد میں بھی گیس لوڈشیڈنگ کی گئی، جس سے روزمرہ زندگی متاثر ہو رہی ہے۔ شہریوں کا کہنا ہے کہ بار بار کی بندش سے معمولات زندگی شدید متاثر ہو رہے ہیں اور گھریلو امور انجام دینا مشکل ہو گیا ہے۔