سیر سپاٹے پر نکلا شوہر بیوی کو گیس اسٹیشن پر بھول گیا

فرانس میں ایک ایسا انوکھا واقعہ پیش آیا جہاں سیر و تفریح کیلئے جانے والا شخص اپنی بیوی کو ہائی وے کے گیس اسٹیشن پر غلطی سے بھول گیا۔

غیر ملکی میڈیا کے مطابق پیرس سے تعلق رکھنے والے شخص نے اپنی بیوی اور بیٹی کے ہمراہ گاڑی میں مراکش کی سیر کا منصوبہ بنایا اور 5 جولائی کو وہ سیر و تفریح کیلئے نکل پڑے۔

میڈیا رپورٹس کے مطابق سفر کیلئے ہائی وے کا انتخاب کرنے کی وجہ سے وہ گاڑی میں فیول ڈلوانے کیلئے مختلف گیس اسٹیشنز پر رکے، تاہم ایک اسٹیشن ایسا بھی تھا جہاں وہ اپنی بیوی کو غلطی سے بھول کر سفر پر نکل پڑا اور 300 کلو میٹر دور جانے کے بعد اسے اپنی بیوی کا خیال آیا۔

اس حوالے سے پولیس کی جانب سے بتایا گیاکہ انہیں مدد کی اس کال پر حیرت ہوئی جبکہ گاڑی میں موجود 22 سالہ بیٹی بھی اپنی والدہ کے حوالے سے بتانے میں ناکام رہی کیونکہ وہ گاڑی میں سو رہی تھی، جسے معلوم ہی نہیں تھا کہ وہ اپنی والدہ کو کون سے اسٹیشن پر چھوڑ کر آئے ہیں۔

پولیس نے مزید بتایا کہ انہوں نے ہائی وے پر قائم متعدد مسافروں کے ٹھہرنے کی جگہ پر خاتون کو تلاش کیا لیکن وہ ناکام رہے، اس کے بعد پولیس نے ٹیکنالوجی کا سہارا لیتے ہوئے خاتون کو موبائل نیٹ ورک کے ذریعے تلاش کیا۔

پولیس کے مطابق خاتون موٹر  وے سروس اسٹیشن پر ہی موجود تھی اور وہ اپنی فیملی کے واپس آنے کا انتظار کر رہی تھی، خاتون کے اپنے شوہر اور بیٹی سے ملنےکے بعد فیملی دوبارہ مراکش کیلئے روانہ ہوگئی۔