ناقابل یقین واقعہ، ایک سالہ بچے نے زہریلے سانپ کو کاٹ کر مار ڈالا

بھارت میں حیرت انگیز واقعے میں ایک سالہ بچے نے زہریلے سانپ کو کاٹ کر مار ڈالا اور بچہ معجزانہ طور  پر بچ گیا۔

بھارتی میڈیا رپورٹس کے مطابق ریاست بہار کے ضلع چمپارن میں ایک حیران کن اور ناقابل یقین واقعہ پیش آیا ہے جہاں ایک سالہ بچے نے کھیلتے ہوئے  کوبرا سانپ کو کاٹ کر مار ڈالا، خوش قسمتی سے بچہ زندہ بچ گیا جس کی حالت اب مستحکم بتائی جا رہی ہے۔

میڈیا رپورٹس کے مطابق ننھا گووندا اپنے گھر کے صحن میں کھیل رہا تھا کہ تقریباً دو فٹ لمبا کوبرا گھر میں داخل ہو گیا، بچے نے سانپ کو کھلونا سمجھا اور اسے پکڑ کر اپنے منہ میں لے لیا، جس کے بعد اُس نے سانپ کو زور سے کاٹا جس کے بعد سانپ موقع پر ہی دم توڑ گیا۔

بچے کی نانی نے جب یہ منظر دیکھا تو وہ ہکا بکا رہ گئیں لیکن اس وقت تک بچہ سانپ کو دو حصوں میں چیر چکا تھا۔

واقعے کے فوراً بعد گووندا بے ہوش ہوگیا جس پر اسے فوراً قریبی پرائمری ہیلتھ سینٹر پہنچایا گیا، جہاں ابتدائی طبی امداد کے بعد اسے مزید علاج کے لیے گورنمنٹ میڈیکل کالج منتقل کیا گیا۔

اسپتال ذرائع کے مطابق بچے کے جسم میں زہر کی کوئی علامات نظر نہیں آئی اور وہ اب مکمل طبی نگرانی میں ہے۔ بچے کی نانی کے مطابق واقعے کے وقت بچے کی والدہ لکڑیاں چننے کے لیے گھر سے باہر گئی ہوئی تھیں۔