گھر کا سلو وائی فائی منٹوں میں فاسٹ کرنے کا طریقہ

موجودہ دور میں جہاں گھر سے کام (ریمورٹ ورک) کرنے کا رجحان بڑھ رہا ہے، وہاں تیز رفتار انٹرنیٹ کی اہمیت پہلے سے کہیں زیادہ بڑھ چکی ہے۔

 اکثر صارفین وائی فائی نیٹ ورکس پر انحصار کرتے ہیں، لیکن جب انٹرنیٹ کی رفتار اچانک کم ہوجاتی ہے تو یہ نہ صرف کام میں خلل ڈالتی ہے بلکہ مزاج پر بھی اثر ڈالتی ہے۔ تاہم، ماہرین کا کہنا ہے کہ ایک سادہ سی ٹرک، یعنی راؤٹر کو باقاعدگی سے ری بوٹ کرنا، اس مسئلے کا آسان اور مؤثر حل ہو سکتا ہے۔

راؤٹر بنیادی طور پر وائرڈ موڈیم سے جڑ کر انٹرنیٹ کنکشن کو وائرلیس سگنل میں تبدیل کرتا ہے، جس سے گھر یا دفتر کی مختلف ڈیوائسز وائی فائی کے ذریعے انٹرنیٹ سے جڑ جاتی ہیں۔ خود راؤٹر انٹرنیٹ فراہم نہیں کرتا بلکہ یہ موڈیم پر انحصار کرتا ہے۔ راؤٹر میں موجود فائر وال وائرڈ اور وائرلیس نیٹ ورکس کو سیکیورٹی فراہم کرتا ہے اور ہیکنگ جیسے خطرات سے محفوظ رکھتا ہے۔

ماہرین کے مطابق وائی فائی اسپیڈ میں کمی، ڈس کنکشن، ویڈیوز کا بفر ہونا یا ڈاؤن لوڈ فیل ہونے جیسے مسائل اکثر سافٹ ویئر بگز یا کیشے کے جمع ہونے کی وجہ سے ہوتے ہیں۔ ان مسائل سے نمٹنے کے لیے راؤٹر کو ری بوٹ کرنا نہایت مؤثر ثابت ہوتا ہے۔ یہ عمل راؤٹر کی کارکردگی کو بہتر بناتا ہے اور نیٹ ورک کی اسپیڈ کو پہلے جیسی رفتار پر واپس لے آتا ہے۔

اگرچہ راؤٹر کو روزانہ ری بوٹ کرنا ضروری نہیں، تاہم ماہرین مشورہ دیتے ہیں کہ گھریلو یا چھوٹے دفاتر میں مہینے میں کم از کم ایک بار راؤٹر کو ری بوٹ ضرور کیا جائے۔ اس سے نیٹ ورک مستحکم رہتا ہے اور تکنیکی مسائل کم ہوتے ہیں۔

ری بوٹ کرنے کا طریقہ کار بھی انتہائی آسان ہے۔ صارفین صرف راؤٹر کا پاور بٹن آف کرکے 30 سیکنڈ سے ایک منٹ کے بعد دوبارہ آن کریں۔ یاد رہے کہ ری بوٹ کا مطلب ری سیٹ نہیں ہوتا، کیونکہ ری سیٹ بٹن دبانے سے فیکٹری سیٹنگز بحال ہو جاتی ہیں، جو عام صارفین کے لیے مسائل پیدا کر سکتی ہیں۔

اس کے علاوہ کچھ راؤٹرز کو موبائل ایپ یا ویب بیسڈ کنٹرول پینل کے ذریعے بھی ری بوٹ کیا جا سکتا ہے، مگر یہ طریقہ عام صارفین کے لیے پیچیدہ ہو سکتا ہے۔ اس لیے روایتی طریقے سے پاور آف اور آن کرنا زیادہ آسان اور مؤثر ہے۔

ماہرین کا کہنا ہے کہ یہ سادہ سا قدم وائی فائی کی کارکردگی بہتر بنانے، اسپیڈ بڑھانے اور بار بار آنے والے کنکشن مسائل پر قابو پانے میں مدد دے سکتا ہے۔