ماز اسکو نے اسپنٹک چوٹی سر کر کے اسکولی کی تاریخ رقم کر دی

محمد عباس ظفر، جنہیں محبت سے "مازاسکو” کہا جاتا ہے، نے 7,027 میٹر بلند اسپنٹک چوٹی سر کر کے تاریخ رقم کر دی۔ وہ اسکولی اور برالدو ویلی کے پہلے شخص ہیں جنھوں نے کسی بڑے پہاڑ کی چوٹی کو سر کیا ہے۔

انھوں نے سوشل میڈیا پر اس کامیابی کی اطلاع دیتے ہوئے لکھا: الحمدللہ اسپنٹک سمٹ 7027 میٹر۔ یہ کامیابی میں اپنی پھوپھی کے نام کرتا ہوں جو 15 اگست کو وفات پا گئیں۔

ان کا یہ جذباتی پیغام پہاڑوں سے محبت کرنے والوں کے دلوں کو چھو گیا۔

مزاسکو نے یہ مہم اپنی کمپنی K2 Explore Pakistan کے ذریعے کی، جس میں غیر ملکی کوہ پیما بھی شامل تھے۔ وہ نہ صرف ایک باصلاحیت کوہ پیما ہیں بلکہ گلگت بلتستان میں پائیدار سیاحت کے بھرپور حامی بھی ہیں۔

اسپنٹک چوٹی، جسے گولڈن پیک بھی کہا جاتا ہے، گلگت بلتستان کی شگر ویلی میں واقع ہے۔ یہ ایک مشکل مگر خوبصورت پہاڑ ہے، جس کی چوٹی سے راکاپوشی اور دیران جیسے بلند پہاڑوں کا شاندار نظارہ ہوتا ہے۔ یہ چوٹی دنیا بھر کے کئی کوہ پیماؤں کا خواب ہے۔

مز اسکو کا تعلق دور دراز گاؤں اسکولی سے ہے، جو کے ٹو بیس کیمپ جانے والے راستے کا آخری گاؤں ہے۔ اسکولی ان گمنام ہیروز کا گاؤں ہے جو سالوں سے غیر ملکی کوہ پیماؤں کی خدمت کرتے آ رہے ہیں، لیکن عالمی سطح پر انہیں پہچان کم ملی ہے۔

یہ کامیابی صرف ذاتی نہیں بلکہ پوری برالدو ویلی کے لیے ایک فخر کا لمحہ ہے۔ یہ علاقہ زیادہ تر میڈیا کی نظروں سے اوجھل رہتا ہے، حالانکہ بلند پہاڑوں اور سیاحت کے لیے اس کی بڑی اہمیت ہے۔ مز اسکو کی کامیابی نے اس خطے کے نوجوانوں کو نیا حوصلہ دیا ہے۔

مقامی لوگ، ٹریکنگ کمپنیاں اور ساتھی کوہ پیما مز کی ہمت، محنت اور لگن کو خوب سراہ رہے ہیں۔ وہ گلگت بلتستان کے نوجوانوں کے لیے ایک روشن مثال بن چکے ہیں۔