بظاہر ایک جیسے دکھنے والے اصلی اور نقلی لابوبو کی پہچان کیسے کریں؟ آج ہی جان لیں

بیجنگ – ہانگ کانگ کے مشہور آرٹسٹ کاسنگ لُنگ کے تخلیق کردہ کردار لابوبو نے چند ہی برسوں میں آرٹ کے ایک نمونے سے لے کر دنیا بھر میں شہرت پانے والے کھلونے کی شکل اختیار کر لی ہے۔ چینی کمپنی پاپ مارٹ کی تیار کردہ اس گڑیا نے عالمی مارکیٹ میں دھوم مچا دی ہے اور کمپنی نے حالیہ رپورٹ میں تقریباً 400 فیصد منافع ظاہر کیا ہے۔

تاہم بڑھتی ہوئی طلب کے ساتھ ساتھ جعلی لابوبو بھی مارکیٹ میں آنے لگے ہیں جنہیں طنزیہ طور پر "لافوفو” کہا جاتا ہے۔ ماہرین کا کہنا ہے کہ یہ جعلی کھلونے نہ صرف کلیکٹرز کے لیے نقصان دہ ہیں بلکہ اصل برانڈ کی ساکھ کو بھی متاثر کرتے ہیں۔ اسی لیے ضروری ہے کہ خریدار خریداری کے وقت چند بنیادی علامات پر دھیان دیں۔

اصل لابوبو کی پہچان

1. پیکنگ اور ڈبہ:
   اصلی پاپ مارٹ کے ڈبے مضبوط، میٹ فنش اور درست رنگوں والے ہوتے ہیں۔ جعلی ڈبے اکثر بھڑکیلے یا کمزور دکھائی دیتے ہیں۔
2. ہولوگرافک اسٹیکر:
   اصلی اسٹیکر میں 3D جھلک اور صاف تحریر ہوتی ہے، نقلی میں یہ مدھم اور دھندلے ہوتے ہیں۔
3. کیو آر کوڈ:
   اصلی ڈبے کا کیو آر کوڈ اسکین کرنے پر براہِ راست پاپ مارٹ کی اینٹی کاپی ویب سائٹ پر جاتا ہے، جعلی میں یہ ناکام ہو جاتا ہے یا کسی اور صفحے پر لے جاتا ہے۔
4. اسپلنگ اور لوگو:
   پاپ مارٹ کی اسپیلنگ یا لوگو اگر ٹیڑھا یا غلط ہو تو سمجھ جائیں کہ یہ نقلی ہے۔

گڑیا کی کوالٹی

• وائنل ڈولز: اصلی لابوبو نرم اور مضبوط ہوتے ہیں، نقلی عموماً سخت یا پلاسٹک جیسے لگتے ہیں۔
• پلس ڈولز: اصلی گڑیا کی سلائی درست اور بال گھنے و نرم ہوتے ہیں، نقلی میں ڈھیلے دھاگے اور کھردرا فر ملتا ہے۔
• پینٹ اور آنکھیں: اصلی میں رنگ کاری درست اور آنکھیں چمکدار ہوتی ہیں، جعلی میں رنگ بے ترتیب اور دھبے دار ملتے ہیں۔
• دانتوں کی گنتی: اصلی لابوبو کے نو دانت ہوتے ہیں، جعلی میں اکثر یہ فرق رہ جاتا ہے۔
• پاؤں کے نشانات: اصلی گڑیا کے پاؤں پر پاپ مارٹ اور آرٹسٹ کا نام ابھرا ہوتا ہے، نئے ماڈلز میں یووی لائٹ پر چھپی ہوئی شکل بھی سامنے آتی ہے۔

محفوظ خریداری کے طریقے

• ہمیشہ پاپ مارٹ کی آفیشل دکان یا منظور شدہ ڈسٹری بیوٹرز سے خریدیں۔
• غیر مصدقہ آن لائن بیچنے والوں اور سوشل میڈیا مارکیٹ پلیس پر احتیاط کریں۔
• بیچنے والے کے ریویوز اور فیڈبیک لازمی چیک کریں۔
• خریداری کے بعد تصدیق کے لیے پاپ مارٹ کی آفیشل ایپ استعمال کریں۔

ماہرین کے مطابق، اگر یہ چند احتیاطی تدابیر اپنائی جائیں تو کلیکٹرز اپنے قیمتی لابوبو کلیکشن کو جعلی مصنوعات سے محفوظ رکھ سکتے ہیں۔