ناران میں غیر شادی شدہ جوڑوں کے داخلے پر پابندی کی خبریں؟ پولیس کا موقف آگیا

ناران میں غیر شادی شدہ جوڑوں کے داخلے پر پابندی سے متعلق خبروں پر پولیس کا موقف سامنے آگیا ہے۔

خیبرپختونخوا کے مشہور سیاحتی مقام ناران سے متعلق سوشل میڈیا پر گردش کرنے والا یہ دعویٰ کہ غیر شادی شدہ جوڑوں کے داخلے پر پابندی عائد کر دی گئی ہے اور پولیس نکاح نامے کا مطالبہ کر رہی ہے، جھوٹا اور بے بنیاد ثابت ہوا ہے۔

 فیس بک پر 27 ستمبر کو ایک پوسٹ میں ایک مبینہ ہدایت نامے کا بورڈ دکھایا گیا جس میں لکھا تھا کہ ناران میں داخلے کے لیے نکاح نامہ ضروری ہے۔ یہ پوسٹ دیکھتے ہی دیکھتے وائرل ہو گئی اور ہزاروں افراد تک پہنچ گئی۔ بعد ازاں ایکس (سابقہ ٹوئٹر) پر بھی اس دعوے کو مزید پھیلایا گیا۔

تاہم، مانسہرہ پولیس حکام نے ان دعوؤں کی سختی سے تردید کرتے ہوئے کہا ہے کہ ناران میں اس نوعیت کی کوئی پابندی نافذ نہیں کی گئی۔ ڈسٹرکٹ پولیس آفیسر (ڈی پی او) شفیع اللہ گنڈا پور نے وضاحت کی کہ ایسی خبریں مکمل طور پر گمراہ کن ہیں اور تمام سیاحوں کو ناران میں خوش آمدید کہا جاتا ہے۔

 پولیس نے اپنے آفیشل فیس بک پیج پر بھی بیان جاری کیا جس میں وائرل بورڈ کی تصویر کو جعلی قرار دیا گیا اور کہا گیا کہ سوشل میڈیا پر کیا جانے والا ہر دعویٰ بے بنیاد ہے۔

تحصیل بالاکوٹ کے اسسٹنٹ کمشنر محمد نادر نے بھی ان اطلاعات کو جھوٹا قرار دیتے ہوئے کہا کہ انتظامیہ نے اس حوالے سے کوئی سرکاری ہدایت جاری نہیں کی۔ ان کے مطابق پولیس معمول کے مطابق گاڑیوں کی چیکنگ کرتی ہے جو طے شدہ اصولوں کے مطابق ہے۔

حکام نے عوام سے اپیل کی ہے کہ سوشل میڈیا پر پھیلائی جانے والی من گھڑت خبروں پر یقین نہ کریں اور صرف مستند اور سرکاری ذرائع سے معلومات حاصل کریں۔ واضح رہے کہ ناران میں نکاح نامے کی شرط سے متعلق تمام خبریں جھوٹ پر مبنی ہیں اور تمام سیاحوں کو بغیر کسی امتیاز کے خوش آمدید کہا جاتا ہے۔