کمپنی کا ملازمین کو سونے سے بنے کی بورڈ بٹنوں کا تحفہ

چینی ٹیکنالوجی کمپنی انسٹا 360 نے ایک دلچسپ اور منفرد بونس اسکیم کا آغاز کیا ہے جس میں بہترین کارکردگی کا مظاہرہ کرنے والے ملازمین کو سونے سے بنے کی بورڈ بٹن یا کی کیپس تحفے کے طور پر دیے جاتے ہیں۔ یہ روایات گزشتہ چار سالوں سے جاری ہیں اور ملازمین کی حوصلہ افزائی کے لیے ایک بہترین اقدام سمجھی جاتی ہیں۔

انسٹا 360 کمپنی کا تعلق چین کے شہر شینزن سے ہے، جو گوانگ ڈونگ صوبے میں واقع ہے۔ اس کمپنی نے گزشتہ دنوں اپنے بہترین پروگرامرز کو سونے کے 21 کی کیپس انعام کے طور پر دیے۔ ان کیپس میں سب سے بھاری کیپ "اسپیس کی” (Space key) تھی، جس کا وزن 35.02 گرام تھا اور یہ مکمل طور پر خالص سونے سے تیار کی گئی تھی۔ اس کی کیپ کی قیمت تقریباً 3 لاکھ 20 ہزار یوآن (تقریباً ایک کروڑ 26 لاکھ پاکستانی روپے) تک پہنچ گئی۔

یہ منفرد بونس اسکیم ہر سال پروگرامرز ڈے کے موقع پر دی جاتی ہے اور کمپنی کی جانب سے گزشتہ برسوں میں 55 سونے کی کیپس ملازمین میں تقسیم کی گئی ہیں۔ سونے کی قیمتوں میں اضافے کے باعث، ان کی کیپس کی حقیقی قیمت میں بھی نمایاں اضافہ ہو چکا ہے۔

انسٹا 360 کی کمپنی کو چینی ٹیکنالوجی انڈسٹری میں "گولڈ فیکٹری” کے نام سے جانا جاتا ہے۔ کمپنی کے مطابق سونا ملازمین کو اس کی مالی قدر کی وجہ سے نہیں دیا جاتا، بلکہ اس کا مقصد استحکام اور کمپنی کی مضبوط بنیادوں کو ظاہر کرنا ہے۔ کمپنی کے بانی، لیو جیانگ کانگ نے کہا کہ سونا دینے کا مقصد اس کی مالی اہمیت نہیں، بلکہ اس کی قدر کو دکھانا ہے، کیونکہ کمپنی کا استحکام اس کے باصلاحیت ملازمین پر منحصر ہے۔

کمپنی کی جانب سے دیگر خصوصی مواقع پر بھی سونے کے تحائف دیے جاتے ہیں، جیسے کہ جب کسی ملازم کی شادی ہوتی ہے یا بچے کی پیدائش ہوتی ہے، تو انہیں 1 گرام کا سونا سکہ دیا جاتا ہے۔ کمپنی کے 10 سال مکمل ہونے پر تمام ملازمین کو ایک "گولڈ بلائنڈ باکس” تحفے میں دیا گیا، جس میں خالص سونے سے بنے اسٹیکرز شامل تھے۔ ہر اسٹیکر کا وزن 0.36 گرام تھا۔