خطرہ، امید یا نیا دور!!! 2026 میں کیا ہونے والا ہے؟ 5 بڑے سرپرائز کیلئے تیار رہیں

دنیا بھر میں 2026 کو ایک اہم سال کے طور پر دیکھا جا رہا ہے، جس میں عالمی سیاست، موسمیاتی تبدیلی، کھیل اور خلائی مشنز میں بڑے واقعات رونما ہوں گے۔

 ماہرین کے مطابق عالمی درجہ حرارت میں اضافہ جاری رہنے کا امکان ہے۔ گزشتہ سال ریکارڈ گرمی دیکھی گئی تھی اور اقوام متحدہ کے مطابق اگلے چند برسوں میں عالمی درجہ حرارت کے نئے ریکارڈ کے امکانات 80 فیصد تک پہنچ چکے ہیں۔

برازیل میں حالیہ موسمیاتی کانفرنس COP30 نے ثابت کیا کہ جغرافیائی کشیدگی کے باوجود عالمی مذاکرات جاری ہیں۔ ماہرین کا کہنا ہے کہ 2026 کو موسمیاتی سفارت کاری کے نئے دور کا آغاز سمجھا جائے گا۔ اپریل میں کولمبیا میں فوسل فیول کے خاتمے پر عالمی کانفرنس بھی اسی سلسلے کی اہم کڑی ہوگی۔

کھیل کے میدان میں 2026 فیفا ورلڈ کپ ایک تاریخی ٹورنامنٹ ثابت ہوگا۔ پہلی بار 48 ممالک تین میزبان ممالک، امریکہ، کینیڈا اور میکسیکو میں مقابلہ کریں گے۔ ٹورنامنٹ 11 جون سے 19 جولائی تک جاری رہے گا۔ فرانس کی ٹیم کائلان ایمباپے کی قیادت میں مضبوط دعویدار سمجھی جا رہی ہے، جبکہ کرسٹیانو رونالڈو اپنا آخری ورلڈ کپ کھیلیں گے۔

مشرق وسطیٰ میں اسرائیل اور حماس کے درمیان امریکی دباؤ میں ہونے والی جنگ بندی 2026 میں سیاسی کشمکش کا مرکز بنی رہے گی۔ ٹرمپ کے پیش کردہ امن منصوبے کے متعدد نکات ابھی غیر واضح ہیں، جبکہ غزہ کی بحالی اور انتظامی ڈھانچے پر وسیع اختلافات موجود ہیں۔ اسرائیلی وزیر اعظم بنیامین نتن یاہو 2026 کے آخر تک انتخابات میں حصہ لینے کا ارادہ رکھتے ہیں، جبکہ ان کی مخلوط حکومت کی پارلیمانی اکثریت کمزور ہو چکی ہے۔

امریکی سیاست میں 2026 کے مڈ ٹرم انتخابات اہمیت رکھتے ہیں۔ ریپبلکنز کی معمولی اکثریت خطرے میں ہے اور ڈیموکریٹس ایوانِ نمائندگان اور سینیٹ میں نشستیں واپس لینے کی کوشش کریں گے۔ انتخابات کے نتائج ٹرمپ کی پالیسیوں اور انتظامی اثر و رسوخ کے مستقبل کا تعین کریں گے۔

خلائی دوڑ میں 2026 ایک تاریخی سال بن سکتا ہے۔ ناسا کا آرٹیمس 2 مشن اپریل میں چاند پر روانہ ہو سکتا ہے، جبکہ چین چانگ ای 7 مشن کے ذریعے چاند کے جنوبی قطب کی تحقیق کرے گا اور نئے انسان بردار خلائی جہاز کی آزمائش کرے گا۔

 بھارت 2027 میں اپنے پہلے خلاباز کو مدار میں بھیجنے کی تیاری کر رہا ہے۔ ماہرین کے مطابق چاند مستقبل میں مریخ کے مشنز کا بنیادی پڑاؤ بنے گا، جہاں توانائی، رہائش، مواصلاتی اسٹیشن اور خلائی ٹیکنالوجی کے تجربات کیے جائیں گے۔