ہائی ویز پر ٹریفک سائن نیلے یا سبز رنگوں کے ہی کیوں ہوتے ہیں؟ وجہ جانیے

اگر آپ پاکستان میں موٹر وے یا کسی بڑی ہائی وے پر سفر کریں تو آپ نے سڑک کنارے مختلف سائن بورڈز ضرور دیکھے ہوں گے۔ یہ بورڈز مختلف علاقوں کی سمت اور فاصلے کے بارے میں معلومات فراہم کرتے ہیں۔

یہ سائن بورڈز عام طور پر سبز یا نیلے رنگ کے ہوتے ہیں۔ مگر صرف یہ دو رنگ ہی کیوں استعمال کیے جاتے ہیں؟ اس کے پیچھے دلچسپ اور سادہ وجوہات ہیں۔

یہ تصور 20ویں صدی میں پیدا ہوا جب مختلف ممالک نے روڈ سیفٹی قوانین کو یکجا کرنے پر کام شروع کیا۔ 1968 میں ویانا کنونشن آن روڈ ٹریفک کو عالمی سطح پر اپنایا گیا۔ اس کنونشن میں ہائی ویز، حادثات کے ردعمل، ٹریفک کے درمیان حفاظتی فاصلے اور ہائی ویز کے ٹریفک سائن بورڈز کے رنگوں کا تعین کیا گیا۔

ممالک کو نیلے اور سبز رنگوں میں سے کسی ایک رنگ کا انتخاب کرنے کی اجازت دی گئی۔ دنیا بھر میں کئی ممالک نے اسی اصول کو اپنایا۔ مثال کے طور پر، جرمنی، فرانس، اسپین اور پولینڈ میں نیلے سائن بورڈز استعمال ہوتے ہیں جبکہ امریکہ، فن لینڈ، سویڈن، یونان، ترکی اور سوئٹزرلینڈ میں سبز سائن بورڈز عام ہیں۔ پاکستان میں دونوں رنگ مختلف ہائی ویز پر استعمال کیے جاتے ہیں۔

صرف یہ دو رنگ استعمال کرنے کی وجہ یہ ہے کہ یہ رنگ آسانی سے دیکھے اور پڑھے جا سکتے ہیں۔ ہماری آنکھیں سبز اور نیلے رنگوں کو تیزی سے پراسیس کر لیتی ہیں اور یہ رنگ وقت کے ساتھ مدھم بھی نہیں پڑتے۔ اسی وجہ سے یہ سڑک پر ہائی ویز کے لیے موزوں ہیں۔