دفتر وقت پر پہنچنے پر ملازمہ کو نوکری سے نکال دیا گیا

اسپین میں ایک نوجوان خاتون کو کمپنی نے اس وجہ سے نوکری سے فارغ کر دیا کہ وہ اپنے مقررہ وقت سے کئی گھنٹے پہلے دفتر پہنچ جاتی تھیں۔ ملازمہ نے اس فیصلے کو چیلنج کرتے ہوئے عدالت میں مقدمہ دائر کیا۔

رپورٹ کے مطابق خاتون عام طور پر صبح 6:45 سے 7:00 بجے کے درمیان دفتر آ جاتی تھیں، جبکہ ان کا کام کا آغاز 7:30 بجے ہونا تھا۔ اس کی وجہ سے وہ ساتھی ملازمین سے پہلے کام شروع کر دیتی تھیں، جسے کمپنی کی انتظامیہ نے غیر پیشہ ورانہ رویہ قرار دیا۔

2023 میں پہلی وارننگ کے باوجود خاتون نے اپنی عادت تبدیل نہیں کی، اور سال کے آغاز میں مالک نے انہیں "سنگین بدانتظامی” کے تحت برطرف کر دیا۔

مالک نے دلیل دی کہ اتنی جلدی پہنچنے سے ملازمہ کے پاس کوئی کام نہیں تھا اور وہ کمپنی کی کارکردگی میں حصہ نہیں ڈال رہی تھیں۔

عدالت نے مالک کے حق میں فیصلہ سناتے ہوئے کہا کہ ملازمہ نے انتباہات کو بار بار نظر انداز کیا اور اس کا رویہ دیگر ملازمین اور انتظامیہ کے تعلقات پر منفی اثر ڈال رہا تھا۔

عدالت کے مطابق یہ رویہ اعتماد اور وفاداری کے تعلقات کے لیے نقصان دہ تھا، اس لیے نوکری ختم کرنا جائز تھا۔