کیا کمرے کا بلب ہمیشہ روشن رکھنے سے بجلی کا بل کم ہوتا ہے؟

اکثر لوگوں کے ذہن میں یہ سوال آتا ہے کہ کیا کمرے میں ایل ای ڈی بلب کو مسلسل جلتا رہنے دینا بجلی کی بچت کرتا ہے یا نہیں۔ عام طور پر یہ سمجھا جاتا ہے کہ چونکہ ایل ای ڈی لائٹس کم بجلی استعمال کرتی ہیں، اس لیے انہیں بند کرنا ضروری نہیں۔ تاہم حقیقت اس سے کچھ مختلف ہے۔

امریکی محکمہ توانائی کی ایک حالیہ تحقیق کے مطابق جب بھی کوئی شخص کمرہ چھوڑے تو بلب بند کر دینا زیادہ بہتر ہوتا ہے۔ اس سے بجلی کی بچت ہوتی ہے اور ماہانہ بل میں بھی کمی آتی ہے۔ تحقیق میں واضح کیا گیا ہے کہ زیادہ دیر تک خالی کمرے میں لائٹس جلتی رہیں تو مجموعی طور پر غیر ضروری بجلی خرچ ہوتی ہے۔

البتہ تحقیق میں یہ بھی بتایا گیا ہے کہ ہر صورت میں بلب بند کرنا لازمی نہیں۔ اگر آپ کو یقین ہے کہ آپ 10 سے 15 منٹ کے اندر دوبارہ کمرے میں واپس آ جائیں گے تو لائٹ بند نہ کرنا بہتر ہو سکتا ہے۔ بار بار بلب آن اور آف کرنے سے بجلی کے استعمال میں معمولی اضافہ ہوتا ہے اور بلب کی عمر بھی متاثر ہو سکتی ہے۔

ماہرین کے مطابق اگر واپسی میں زیادہ وقت لگنے کا امکان ہو تو بلب بند کر دینا ہی سمجھ داری ہے۔ اس عادت سے نہ صرف بجلی کا بل کم ہوتا ہے بلکہ بلب زیادہ عرصے تک چلتا ہے۔ یہ ایک سادہ سا عمل ہے جو طویل مدت میں فائدہ دیتا ہے۔