بابا وانگا کی 2026 کی پیشگوئیاں؛ حقیقت یا مبالغہ؟

بلغاریہ کی مشہور نابینا نجومی بابا وانگا کی پیشگوئیاں اکثر سوشل میڈیا پر وائرل ہوتی رہتی ہیں۔ حالیہ دنوں میں دعویٰ کیا جا رہا ہے کہ انہوں نے سال 2026 میں تیسری عالمی جنگ اور خلائی مخلوق سے رابطے کی پیشگوئی کی تھی۔ اس نے عوام میں تشویش کی لہر پیدا کر دی ہے۔

سوشل میڈیا پر ان پوسٹس میں بابا وانگا کے نام کو عالمی جنگ، بڑے پیمانے پر قدرتی آفات اور غیر معمولی واقعات کے ساتھ جوڑا جاتا ہے۔ لیکن محققین اور تاریخ دان کہتے ہیں کہ ان دعوؤں کی کوئی مستند بنیاد موجود نہیں۔

بابا وانگا کی وفات 1996ء میں ہوئی تھی۔ انہوں نے اپنی پیشگوئیوں کو کبھی تحریری شکل میں درج نہیں کیا۔ ان سے منسوب معلومات زیادہ تر زبان سے زبان تک منتقل ہونے والی روایات اور بعد کی تعبیرات پر مبنی ہیں۔ یہ تعبیرات اکثر موجودہ عالمی حالات کے مطابق دوبارہ بیان کی جاتی ہیں۔

ماہرین کا کہنا ہے کہ وائرل ہونے والی پیشگوئیاں مبہم ہیں۔ جدید خدشات کے مطابق ان کی تعبیر کی جاتی ہے۔

مثال کے طور پر، ایک پیشگوئی کے مطابق 2028 تک انسان توانائی کے متبادل ذرائع کی تلاش میں سیارہ زہرہ کی طرف پیش رفت کرے گا۔ لیکن سائنسی شواہد کے مطابق یہ سیارہ زندگی کے لیے موزوں نہیں ہے۔

اسی طرح 2020 کی دہائی کے حوالے سے انہوں نے یورپ میں شدید معاشی بحران اور جنگ کی پیشگوئی کی تھی۔ کرونا کی وجہ سے یورپ معاشی مشکلات کا شکار ہوا، لیکن یورپ کے ختم ہونے یا زندگی کے ختم ہونے کے دعوے درست ثابت نہیں ہوئے۔

تجزیہ کار کہتے ہیں کہ یہ پیشگوئیاں اصل میں عوام کے خوف اور غیر یقینی حالات کی عکاسی کرتی ہیں۔ یہ تصدیق شدہ مستقبل بینی نہیں بلکہ ثقافتی اور سوشل میڈیا رجحانات کی عکاسی ہیں۔