رئیل اسٹیٹ کے سیکٹر میں 500 ارب روپے کی چوری ہو رہی ہے: خواجہ آصف

اسلام آباد :  وزیر دفاع خواجہ آصف نے کہا ہے کہ رئیل اسٹیٹ کے سیکٹر میں 500 ارب روپے کی چوری ہو رہی ہے۔

بدھ کو قومی اسمبلی میں اظہار خیال کرتے ہوئے وزیر دفاع خواجہ آصف نے کہا کہ ملک کا ایک ایک بال قرضے میں جکڑا ہوا ہے، ٹیکس نہ دینے والوں کے لیے مستقل حل ڈھونڈنا پڑے گا۔ان کا کہنا تھا کہ ہمارے ریونیو کا ذریعہ ٹیکس ہے جو وصول نہیں ہو رہا۔

انہوں نے کہا کہ پاکستان کے معاشی مسائل کا حل آئی ایم ایف یا دوست ممالک کے پاس نہیں بلکہ یہ ہمارے پاس ہے، ہمیں بیرونی خطرہ نہیں، اندرونی معاشی مسئلہ ہے۔

خواجہ آصف نے کہا کہ اشرافیہ نے ہر چیز پر قبضہ کیا ہوا ہے، بڑے بڑے شاپنگ سینٹرز پر کوئی ٹیکس نہیں، ریئل اسٹیٹ ٹائیکون ملک ریاض جیسے لوگوں کا نام ٹیلی ویژن پر نہیں لیا جا سکتا،وہ جو 190 ملین کی ڈکیتی ہے، اس میں وہ بھی شامل ہیں۔ آپ ملک ریاض کا نام کسی ٹیلی ویژن چینل پر نہیں لے سکے۔

وزیر دفاع نے کہا کہ تمباکو میں 240 ارب روپے چوری ہو رہا ہے۔ تمباکو کی انڈسٹری میں ٹیکس نہ دینے والے افراد پارلیمان کے اراکین ہیں،
آٹو موبیل اور ٹائر میں 50 ارب روپے اور فارماسوٹیکل میں 65 ارب روپے اور چائے کی امپورٹ میں 45 ارب روپے کی چوری ہو رہی ہے۔

انہوں نے کہا کہ یونیورسٹیوں میں مافیا ہیں جو فنڈز کھا رہے ہیں،ایک غریب ملک ہے جہاں کروڑوں کے لوگ فاقے کاٹ رہے ہیں اور 70 یا 80 فیصد دو اور تین وقت کا کھانا نہیں کھا سکتی اور اشرافیہ کیا گُل کھلا رہی ہیں،گزشتہ چار سال میں مافیاز کو تحفظ دیا گیا، ایک مستحکم سیاسی حکومت قائم ہو جو ان لوگوں پر قابو پا سکے۔

یہ پڑھیں : عمران خان منصوبے کے تحت اداروں کو متنازعہ بنانا چاہتے ہیں : خواجہ آصف