سینیٹ ضمنی الیکشن: پیپلز پارٹی 4، ن لیگ اور جے یو آئی ایک، ایک نشست پر کامیاب

سینیٹ (ایوان بالا) کی 6 خالی ہونے والی نشستوں پر ضمنی انتخاب میں پیپلز پارٹی کے 4 جب کہ ن لیگ اور جمعیت علمائے اسلام کے ایک، ایک امیدوار کامیاب ہوگئے ہیں۔

اسلام آباد، بلوچستان اور سندھ سے سینیٹ کی نشستوں کے لیے ضمنی انتخاب پر پولنگ کا آغاز صبح 9 بجے ہوا جو شام 4 بجے تک جاری رہا۔

اسلام آباد کی نشست پر حکومتی اتحاد کے مشترکہ امیدوار یوسف رضا گیلانی اپنی ہی خالی کی ہوئی نشست پر دوبارہ سینیٹر منتخب ہوگئے۔

قومی اسمبلی میں مجموعی طور 301 ارکان اسمبلی نے ووٹ کاسٹ کیا، حکومتی اتحاد کے یوسف رضا گیلانی اسلام آباد کی نشست پر کامیاب قرار پائے۔ یوسف رضا گیلانی کو 204 اور سنی اتحاد کونسل کے امیدوار الیاس مہربان کو 88ووٹ ملے۔

سندھ اسمبلی میں سینیٹ کی دو نشستوں کے لیے مجموعی طور پر 124 ووٹ کاسٹ کئے گئے جن میں سے 123 ووٹ درست قرار پائے۔ پیپلز پارٹی کے دونوں امیدواروں نے میدان مار لیا۔ اسلم ابڑو اور سیف اللہ دھاریجو کامیاب ہوگئے۔ سیف اللہ دھاریجو  کو 58 اور اسلم ابڑو کو 57 ووٹ ملے۔

بلوچستان سے سینیٹ کی تین خالی نشستوں پر انتخابات مکمل ہوگئے، اسمبلی میں 65 ارکان کے ایوان میں سے 61 ووٹ کاسٹ ہوئے۔  پیپلزپارٹی کے میر عبدالقدوس بزنجو 23، مسلم لیگ ن کے دوستین ڈومکی 17 اور جمیعت علمائے اسلام ف کے۔ عبدالشکور نے 16 ووٹ لے کر کامیابی حاصل کرلی۔

اپنی نشستیں خالی کرنے والوں میں سید یوسف رضا گیلانی اور مولانا عبدالغفور حیدری بھی شامل ہیں جو حالیہ عام انتخابات میں اپنی کامیابی کے بعد قومی اسمبلی میں شامل ہوئے ہیں۔

اسی طرح نثار احمد کھوڑو اور جام مہتاب حسین ڈہر سندھ اسمبلی کے رکن منتخب ہوئے جب کہ شہزادہ احمد عمر احمد زئی اور سرفراز احمد بگٹی بلوچستان اسمبلی کے رکن منتخب ہوئے۔

یاد رہے کہ سینیٹ کی 6 نشستیں یوسف رضا گیلانی، مولانا عبدالغفورحیدری، نثارکھوڑو، جام مہتاب، پرنس احمد عمر اور سرفرازبگٹی کے مستعفی ہونے کے بعد خالی ہوئی تھیں۔