ایم کیو ایم پاکستان میں اختلافات شدت اختیار کرگئے

متحدہ قومی موومنٹ (ایم کیو ایم) پاکستان میں اختلافات شدت اختیار کرگئے، تنظیمی عہدوں کی تقسیم پر متعدد رہنما ناراض ہو گئے۔

بہادر آباد مرکز میں پارٹی کا تنظیمی اجلاس ہوا، جس میں عہدوں کی تقسیم عمل میں آنی تھی۔

ذرائع کے مطابق اجلاس کے دوران اہم رہنماؤں کو نظر انداز کرنے پر کارکنان نے شور شرابا اور ہنگامہ کردیا۔ کارکنان نے احتجاج کرتے ہوئے عہدوں کی تقسیم پر عدم اطمینان کا اظہار کردیا۔

عہدوں کی تقسیم پر اختلاف بڑھنے پر مصطفیٰ کمال اور انیس قائم خانی نے ایم کیو ایم پاکستان کا آفیشل گروپ لیفٹ کردیا، جس سے قیاس آرائیاں جنم لے رہی ہیں کہ وہ اپنے گروپ سمیت متحدہ سے علیحدگی اختیار کر سکتے ہیں۔

واضح رہے کہ تنظیمی عہدوں میں فرقان اطیب سمیت متعدد لوگوں کو شامل نہیں کیا گیا تھا۔