کابینہ میں شامل نئے وزرا اور مشیران کو قلمدان سونپ دیئے گئے، نوٹیفکیشن جاری

اسلام آباد: وفاقی کابینہ کے نئے اراکین کو وزارتوں کے قلمدان سونپ دیے گئے ہیں۔
کابینہ ڈویژن نے وزیراعظم کی منظوری کے بعد اس حوالے سے نوٹیفکیشن جاری کر دیا ہے۔
نوٹیفکیشن کے مطابق طارق فضل چوہدری کو پارلیمانی امور، علی پرویز کو وزارت پیٹرولیم، اور حنیف عباسی کو وزارت ریلوے کا قلمدان سونپا گیا ہے جبکہ خالد مگسی کو سائنس و ٹیکنالوجی، معین وٹو کو آبی وسائل، محمد جنید انور کو میری ٹائم افیئرز، رضا حیات کو وزارت دفاعی پیداوار، اور شزہ فاطمہ خواجہ کو انفارمیشن ٹیکنالوجی اینڈ ٹیلی کمیونیکیشن کی وزارت دی گئی ہے۔
سردار محمد یوسف کو وزارت مذہبی امور اور بین المسالک ہم آہنگی کا ذمہ دار بنایا گیا ہے جبکہ رانا مبشر اقبال کو پبلک افیئرز یونٹ اور مصطفیٰ کمال کو نیشنل ہیلتھ سروسز، ریگولیشنز اینڈ کوآرڈینیشن کی وزارت سونپی گئی ہے۔ اورنگزیب خان کچھی کو قومی ثقافتی ورثے کی وزارت تفویض کی گئی ہے۔
وزیر مملکت کے عہدوں پر مختار احمد ملک کو نیشنل ہیلتھ سروسز، طلال چودھری کو داخلہ و نارکوٹکس کنٹرول، اور وجیہہ قمر کو فیڈرل ایجوکیشن اینڈ پروفیشنل ٹریننگ کا قلمدان دیا گیا ہے۔ ملک رشید احمد خان کو نیشنل فوڈ سیکیورٹی اینڈ ریسرچ، عبدالرحمان کانجو کو پاور اور پبلک افیئرز یونٹ، اور عقیل ملک کو قانون و انصاف کی وزارت سونپی گئی ہے۔
بلال اظہر کیانی کو وزیر مملکت برائے ریلوے، کیسو مل کھئیل داس کو وزیر مملکت برائے مذہبی امور و بین المسالک ہم آہنگی مقرر جبکہ محمد عون ثقلین کو وزیرمملکت برائے اوورسیز پاکستانیز اینڈ ہیومن ریسورس ڈویلپمنٹ مقرر کیا گیا ہے۔
مشیران کے طور پر سید توقیر حسین شاہ کو وزیراعظم آفس، محمد علی کو نجکاری، اور پرویز خٹک کو امور داخلہ کا مشیر مقرر کیا گیا ہے۔
وزیراعظم کے معاونین خصوصی میں ہارون اختر کو انڈسٹریز اینڈ پروڈکشن، حذیفہ رحمان کو قومی ورثہ اینڈ کلچر، مبارک زیب کو قبائلی امور، اور طلحہ برکی کو سیاسی امور کا ذمہ دار بنایا گیا ہے۔