تنخواہ دار طقے کیلئے بُری خبر آگئی؛ حکومت کا اہم فیصلہ

وفاقی حکومت کی جانب سے سیلاب متاثرین کی بحالی اور ٹیکس ہدف مکمل کرنے کے لیے منی بجٹ لانے پر غور کیا جا رہا ہے۔

 مجوزہ منی بجٹ میں لگژری گاڑیوں، سگریٹس اور الیکٹرانک اشیاء پر اضافی لیوی عائد کرنے کی تجاویز زیر غور ہیں۔ ذرائع کے مطابق جون میں درآمدی اشیاء پر کم کی گئی ریگولیٹری ڈیوٹی کے برابر لیوی دوبارہ نافذ کیے جانے کا امکان ہے۔

ایف بی آر حکام کا کہنا ہے کہ الیکٹرانک مصنوعات پر 5 فیصد لیوی لگانے کی تجویز ہے، تاہم اس پر قیمت کی حد طے ہونا ابھی باقی ہے۔ منی بجٹ میں 1800 سی سی اور اس سے زائد انجن کی حامل لگژری گاڑیوں پر بھی اضافی ٹیکس عائد کرنے کا امکان ہے، لیکن اس اقدام کے لیے بین الاقوامی مالیاتی فنڈ (آئی ایم ایف) کی منظوری ضروری ہوگی۔

منی بجٹ کے ذریعے کم از کم 50 ارب روپے کی اضافی آمدن کا ہدف رکھا گیا ہے۔ اس مقصد کے لیے سگریٹ کے ہر پیکٹ پر 50 روپے لیوی عائد کرنے کی بھی تجویز دی گئی ہے۔ یہ لیوی صوبوں کے ساتھ شیئر نہیں کی جائے گی اور اس کی آمدن براہ راست وفاقی حکومت کو حاصل ہوگی۔

ایف بی آر کے مطابق اگست میں ٹیکس وصولی 951 ارب روپے کے ہدف کے مقابلے میں 901 ارب روپے رہی، جس کے نتیجے میں 50 ارب روپے کا شارٹ فال ریکارڈ کیا گیا۔ مجموعی طور پر جولائی تا اگست کے دوران ٹیکس ریونیو میں تقریباً 40 ارب روپے کی کمی دیکھی گئی ہے۔

رواں مالی سال کے لیے ٹیکس وصولی کا ہدف 14 ہزار 131 ارب روپے مقرر کیا گیا ہے، تاہم سیلاب، بجلی و گیس کے کم استعمال اور کاروباری سرگرمیوں میں سستی کے باعث ایف بی آر کو مطلوبہ ٹیکس وصولی میں مشکلات کا سامنا ہے۔