ایک لیٹر پیٹرول پر شہری کتنا ٹیکس ادا کر رہے ہیں؟ بڑی خبر آگئی

حکومت کی جانب سے عوام پر پیٹرولیم مصنوعات کے بھاری ٹیکسوں کا انکشاف سامنے آیا ہے، جس کے مطابق فی لیٹر پیٹرول و ڈیزل پر 90 روپے سے زائد ٹیکس وصول کیا جا رہا ہے۔

 نجی ٹی وی کو حاصل ہونے والی پیٹرولیم ڈویژن کی دستاویزات کے مطابق موجودہ وقت میں فی لیٹر پیٹرول کی قیمت 250 روپے سے تجاوز کر چکی ہے، تاہم اس میں سے 94 روپے 89 پیسے ٹیکسز کی مد میں حکومت کے خزانے میں جاتے ہیں۔ اسی طرح فی لیٹر ڈیزل پر 95 روپے 35 پیسے ٹیکس وصول کیا جا رہا ہے۔

دستاویزات کے مطابق پیٹرول پر 36 فیصد جبکہ ڈیزل پر 35 فیصد ٹیکس لاگو ہے۔ فی لیٹر پیٹرول کی قیمت میں 78 روپے 2 پیسے پیٹرولیم لیوی، 14 روپے 37 پیسے کسٹم ڈیوٹی اور 2 روپے 50 پیسے کلائمیٹ سپورٹ لیوی شامل ہیں۔ دوسری جانب فی لیٹر ڈیزل کی قیمت میں 77 روپے ایک پیسہ پیٹرولیم لیوی، 15 روپے 84 پیسے کسٹم ڈیوٹی اور 2 روپے 50 پیسے کی اضافی لیوی بھی شامل ہے۔

عوامی سطح پر اس قدر بھاری ٹیکسوں سے متعلق آگاہی نہ ہونے کے باعث بیشتر شہری یہ نہیں جانتے کہ ان کے ادا کیے گئے ہر لیٹر کے پیچھے حکومت کو کتنی خطیر رقم حاصل ہو رہی ہے۔ ماہرین کا کہنا ہے کہ حکومت کو پیٹرولیم مصنوعات پر ٹیکسوں کا بوجھ کم کر کے عام آدمی کو ریلیف دینا چاہیے، جو پہلے ہی مہنگائی کی چکی میں پس رہا ہے۔