دودھ کی قیمت میں تاریخی اضافہ؛ یکم اکتوبر سے دودھ کتنے کا ملے گا؟

ڈیری فارمرز ایسوسی ایشن نے دودھ کی قیمت میں فی لیٹر 50 روپے اضافے کا فوری مطالبہ کردیاہے۔

ڈیری فارمرز ایسوسی ایشن کے رہنماؤں نے کراچی پریس کلب میں پریس کانفرنس کے دوران دودھ کی قیمت میں فی لیٹر 50 روپے اضافے کا فوری مطالبہ کرتے ہوئے خبردار کیا ہے کہ اگر حکومت نے ان کی درخواست پر فوری توجہ نہ دی تو نہ صرف انہیں شدید مالی نقصان ہوگا بلکہ مویشی بھوک سے مرنے لگیں گے۔

رہنماؤں نے بتایا کہ حالیہ سیلاب نے ڈیری شعبے کو زبردست نقصان پہنچایا ہے اور دودھ کی پیداوار میں استعمال ہونے والے اخراجات تقریباً 30 فیصد تک بڑھ گئے ہیں، جس کی وجہ سے دودھ کی فراہمی کو برقرار رکھنا مشکل ہو گیا ہے۔ ایسوسی ایشن کے مطابق دودھ کی فراہمی کے آپریشنز روزانہ 3 ارب روپے تک کے نقصان کا باعث بن رہے ہیں۔

کراچی میں ایک ملین سے زائد گائے اور بھینسیں موجود ہیں جو روزانہ تقریباً 50 لاکھ لیٹر دودھ فراہم کرتی ہیں، تاہم بڑھتے ہوئے اخراجات کی وجہ سے یہ شعبہ شدید بحران کا شکار ہو چکا ہے۔ اس وقت دودھ کی قیمت فی لیٹر 220 روپے ہے جو پیداواری لاگت کے مقابلے میں کافی کم ہے، اس لیے فارمرز کا کہنا ہے کہ دودھ کی قیمت 270 روپے فی لیٹر تک بڑھانا ناگزیر ہے۔

رہنماؤں نے حکومت سندھ کو خبردار کیا ہے کہ اگر 1 اکتوبر تک دودھ کی قیمت میں اضافے کا نوٹیفکیشن جاری نہ کیا گیا تو ڈیری فارمرز وزیراعلیٰ ہاؤس کے باہر احتجاج کریں گے۔ انہوں نے کہا کہ ورنہ مویشیوں کو چارہ اور دیگر بنیادی ضروریات مہیا نہ ہونے کی صورت میں ان کی زندگیاں خطرے میں پڑ جائیں گی۔