اپنا کاروبار شروع کرنے کے خواہشمند افراد کے لیے بڑی خوشخبری؛ حکومت کا اہم اقدام

پنجاب حکومت نے کاروبار شروع کرنے کے خواہشمند افراد کے لیے بڑی سہولت متعارف کروا دی ہے۔

پنجاب حکومت نے کاروبار شروع کرنے کے خواہشمند افراد کے لیے ایک بڑی سہولت متعارف کراتے ہوئے صوبے میں ای گورننس کے فروغ کی جانب اہم قدم اٹھایا ہے۔ اس حوالے سے ’ای بز‘ پورٹل کا باقاعدہ آغاز کر دیا گیا ہے، جس کا افتتاح چیف سیکریٹری پنجاب نے ایڈمنسٹریٹو سیکریٹریز کمیٹی کے اجلاس کے دوران کیا۔

نئے آن لائن پورٹل کے ذریعے 30 مختلف اقسام کے کاروبار کے لیے این او سی (NOC) کے حصول کا عمل مکمل طور پر ڈیجیٹل کر دیا گیا ہے۔ اس نظام کے تحت تصدیق اور منظوری کا سارا عمل الیکٹرانک طریقے سے انجام پائے گا، جس سے کسی بھی مرحلے پر فزیکل فائل یا روایتی کاغذی کارروائی کی ضرورت باقی نہیں رہے گی۔

چیف سیکریٹری پنجاب نے کہا کہ ای بز پورٹل کاروباری طبقے کے لیے ایک بڑی سہولت ہے، جس سے اب این او سی کے لیے دفاتر کے طویل اور غیر ضروری چکروں سے نجات ملے گی۔ انہوں نے اس موقع پر پنجاب انفارمیشن ٹیکنالوجی بورڈ (PITB) کو ہدایت دی کہ دسمبر تک تمام متعلقہ سروسز کو مکمل طور پر ڈیجیٹل کر دیا جائے۔

ان کا کہنا تھا کہ پنجاب حکومت جدید ٹیکنالوجی کے مؤثر استعمال سے شہریوں اور کاروباری برادری کی زندگیوں میں آسانی پیدا کر رہی ہے۔ چیف سیکریٹری نے بتایا کہ ای فاس (e-FaAS) اور ای پروکیورمنٹ جیسے منصوبوں پر بھی کامیابی سے عملدرآمد جاری ہے، جو صوبائی سطح پر ڈیجیٹل تبدیلی کے عمل کو مزید تقویت دے رہے ہیں۔