ہنڈائی کی ہائبرڈ گاڑی کی قیمت میں لاکھوں روپے کی کمی؛ نئی قیمت جانیے

ہنڈائی نشاط موٹرز نے اکتوبر 2025 کے لیے اپنی دو مقبول ہائبرڈ گاڑیوں، سانتافی ہائبرڈ اور ایلانترا ہائبرڈ پر خصوصی آفرز کا اعلان کیا ہے۔

 یہ آفر "ہنڈائی اکتوبر آفر” کے نام سے متعارف کرائی گئی ہے، جس کا مقصد صارفین کو اضافی مالی سہولت فراہم کرنا اور ہائبرڈ گاڑیوں کی فروخت کو فروغ دینا ہے۔

کمپنی کے مطابق سانتافی ہائبرڈ خریدنے والے صارفین کو 50 فیصد رجسٹریشن سپورٹ دی جائے گی، جو زیادہ سے زیادہ 2 لاکھ روپے تک ہو سکتی ہے۔ اس کے علاوہ کیش خریداروں کو 7 لاکھ روپے تک کی نقد رعایت بھی فراہم کی جا رہی ہے، جو اس گاڑی کی خریداری کو پہلے سے زیادہ پُرکشش بناتی ہے۔

دوسری جانب ایلانترا ہائبرڈ خریدنے والے کیش کسٹمرز کے لیے بھی 50 فیصد رجسٹریشن سپورٹ دستیاب ہے، جس کی حد 1.5 لاکھ روپے رکھی گئی ہے۔ تاہم، اس ماڈل پر کوئی اضافی نقد رعایت کا اعلان نہیں کیا گیا۔

یہ آفر یکم اکتوبر سے 31 اکتوبر 2025 تک جاری رہے گی اور ملک بھر میں موجود ہنڈائی کے مجاز ڈیلرشپس سے فائدہ اٹھایا جا سکتا ہے۔ کمپنی نے بتایا ہے کہ اس اقدام کا مقصد نہ صرف صارفین کو ریلیف دینا ہے بلکہ پاکستان میں ماحول دوست ہائبرڈ ٹیکنالوجی کو فروغ دینا بھی ہے۔

ہنڈائی کی جانب سے یہ خصوصی پیشکش ایسے وقت میں کی گئی ہے جب ملک میں فیول قیمتوں اور روایتی گاڑیوں کی لاگت میں مسلسل اضافہ دیکھا جا رہا ہے۔ اس کے برعکس ہائبرڈ گاڑیاں کم ایندھن خرچ کرتی ہیں اور ماحول کو بھی کم نقصان پہنچاتی ہیں، اسی لیے صارفین کی دلچسپی ان میں بڑھتی جا رہی ہے۔