سولر پینلز خریدنے کے خواہشمند پاکستانیوں کیلئے خوشخبری؛ قیمت میں اچانک بڑی کمی ہوگئی

پاکستان میں توانائی کے بحران اور بڑھتے ہوئے بجلی کے بلوں کے پیش نظر سولر پینلز کے استعمال کا رجحان تیزی سے بڑھ رہا ہے۔

 بجلی کی لوڈشیڈنگ اور مہنگائی نے گھریلو اور تجارتی صارفین کو متبادل توانائی کے ذرائع کی طرف راغب کیا ہے۔ سولر توانائی نہ صرف ماحول دوست ہے بلکہ یہ صارفین کو بجلی کے بلوں سے بچنے کا ایک سستا اور مؤثر طریقہ بھی فراہم کرتی ہے۔

انرجی ایکسپرٹ انجینیئر نور بادشاہ کا کہنا ہے کہ پاکستان میں اب سولر پینلز کی مقامی اسمبلی اور مینوفیکچرنگ شروع ہو چکی ہے۔ پاکستانی کمپنی نیٹ لائن نے ترک کمپنی کے ساتھ جوائنٹ وینچر میں اسلام آباد کے مضافات میں تقریباً 180 میگاواٹ کی سالانہ صلاحیت کے سولر پینل بنانے کی فیکٹری کا منصوبہ شروع کیا ہے۔ اس فیکٹری کا تخمینہ خرچ تقریباً 30 ملین ڈالر ہے۔ یہ منصوبہ تین مراحل میں مکمل ہو رہا ہے اور سنہ 2025 میں اس کی تکمیل کی توقع ہے، جبکہ 2026 تک یہ فعال ہونے کی امید ہے۔ اس سے پاکستان میں "میڈ ان پاکستان سولر پینلز” کی تیاری ممکن ہو سکے گی اور درآمدات پر انحصار کم ہو جائے گا۔

اس کے علاوہ پنجاب حکومت نے اگست 2024 میں ایک چینی کمپنی AIKO کے ساتھ معاہدہ کیا ہے جس کے تحت صوبے میں ایک بڑا اسمبلی اور مینوفیکچرنگ پلانٹ قائم کیا جائے گا۔ AIKO ایک معروف کلین انرجی ٹیکنالوجی فرم ہے جو سولر پینلز کی تیاری کے لیے مشہور ہے۔ انجینیئر کامران رفیق کا کہنا ہے کہ یہ اقدام خوش آئند ہے کیونکہ جب اسمبلی لائنز مکمل طور پر فعال ہو جائیں گی، تو قیمتوں میں کمی ممکن ہو گی۔ اس کے علاوہ خام مال کی مقامی رسائی سے امپورٹ پر انحصار کم ہوگا اور مارکیٹ مارجنز بھی بہتر ہوں گے۔

حکومت نے 2025-26 کے بجٹ میں مکمل تیار سولر پینلز پر ٹیکس استثنیٰ دیا ہے، جبکہ اسمبل کیے گئے اجزا پر 10 فیصد سیلز ٹیکس لاگو کیا ہے۔ تاہم، مختلف ڈسٹری بیوٹرز چارجز، تنصیب اور ترسیل کے نام پر اضافی قیمتیں وصول کرتے ہیں، جس کی وجہ سے صارفین کو مقرر کردہ قیمت سے کہیں زیادہ ادائیگی کرنی پڑتی ہے۔

انجینیئر شرجیل احمد سلہری نے بتایا کہ اس وقت 3 کلوواٹ کے گرڈ ٹائیڈ سولر سسٹم کی قیمت اوسطاً 90 ہزار روپے فی کلوواٹ ہے۔ جبکہ ہائبرڈ سسٹم کی قیمت 1 لاکھ 50 ہزار سے 1 لاکھ 70 ہزار روپے فی کلوواٹ کے درمیان ہوتی ہے۔ ان کے مطابق یہ قیمتیں صرف پینلز تک محدود نہیں ہوتیں، بلکہ اس میں انورٹرز، وائرنگ، انسٹالیشن اور وارنٹی جیسی اضافی خدمات کی لاگت بھی شامل ہوتی ہے۔