سیمنٹ کی قیمت سے متعلق تشویشناک خبر آگئی

ملک میں سیمنٹ کی قیمتوں میں گزشتہ ہفتے اُتار چڑھاؤ دیکھنے میں آیا۔ کئی شہروں میں قیمت میں معمولی اضافہ جبکہ کچھ شہروں میں معمولی کمی ریکارڈ کی گئی ہے۔

قومی ادارہ برائے شماریات کی رپورٹ کے مطابق 20 نومبر کو ختم ہونے والے ہفتے میں شمالی علاقوں میں سیمنٹ کی فی بوری کی اوسط قیمت 1365 روپے رہی۔ یہ قیمت پچھلے ہفتے کے مقابلے میں 0.22 فیصد زیادہ ہے۔ ایک ہفتہ قبل فی بوری قیمت 1362 روپے تھی۔

جنوبی علاقوں میں صورتحال قدرے مختلف رہی۔ وہاں سیمنٹ کی فی بوری اوسط قیمت 1440 روپے ریکارڈ کی گئی، جو پچھلے ہفتے کے مقابلے میں 0.09 فیصد کم ہے۔ پچھلے ہفتے جنوبی ریجن میں قیمت 1441 روپے تھی۔

شہر کے حساب سے بھی قیمتوں میں فرق دیکھا گیا۔ اسلام آباد میں فی بوری قیمت 1367 روپے رہی جبکہ راولپنڈی میں یہ 1355 روپے رہی۔ گوجرانوالہ میں 1400، سیالکوٹ میں 1350، لاہور میں 1410 اور فیصل آباد میں 1340 روپے فی بوری قیمت ریکارڈ ہوئی۔ سرگودھا میں 1350، ملتان میں 1389، بہاولپور میں 1400، پشاور میں 1353 اور بنوں میں 1300 روپے فی بوری قیمت سامنے آئی۔

جنوبی شہروں میں کراچی میں فی بوری سیمنٹ 1373 روپے رہی۔ حیدرآباد میں قیمت 1427، سکھر میں 1500، لاڑکانہ میں 1407، کوئٹہ میں 1490 اور خضدار میں 1443 روپے ریکارڈ کی گئی۔

مجموعی طور پر دیکھاجائے تو ملک بھر میں سیمنٹ کی قیمتوں میں کوئی بڑا اضافہ یا کمی نہیں ہوئی، تاہم مختلف شہروں میں قیمتوں کا فرق برقرار ہے۔